搞清楚 Ironman 113 係乜傢伙之後，本人開始認真躊躇頭都痕晒應該如何去備戰。
游泳， 本人話晒係屯門第一及二屆蝶泳冠軍，又係合格教生員，幾乎乜鬼拯溺章都考晒 ………….雖然 ………係三十幾年前，游 1.9 公里………應該問題不大！
半馬，還好因為要 Keep 住 burn fat 所以無間斷 keep 住有跑步，十公里一般可以保持 4 分 30 至 4 分 45 一公里，半馬 PB 1 小時 38 ，就算游完水踩完車七除八扣之後兩個半小時限定時間內跑完都應該搞得掂！
單車，四小時內踩 90 公里！呢項真心淆底！一係本人從未試過踩超過 60 公里，二係真心覺得踩單車好吃力，三係 …….踩咁長，屁股應該好痛！
心裏十五個吊桶七上八落之下於是在邪教 whatsapp 群組問下大家如何備戰？點知………..
----- 廣告 Ad -----
有條用生果做名嘅茂利話佢其實唔係好識踩單車！
又有條用牲畜做名嘅茂利話佢其實唔識游水！
再有條童顏中女話，佢其實未跑超過 10 公里！
而幾乎三份二人根本唔識著 Lock 鞋踩單車！
我睇住堆對話開始臉青，過去幾年我不單只參與邪教活動，我更懷疑呢班根本上係一班精神病患者！唔識游水唔識踩單車未跑過半馬你哋去報 Ironman 113？係咪癡X線㗎？
電光火石瞬雷掩耳間邪教教主忽然當頭棒喝一槌定音 : 「X，唔識咪學囉，邊樣唔X掂咪練到掂囉！重點係先決定咗去馬，就練好佢，練掂佢！無嘢係練唔到嘅！仲有，最緊要健康！」
於是乎，更加恐怖嘅事情發生了…………
----- 廣告 Ad -----
生果教徒恨恨潛心苦練單車，禮聘前香港越野單車代表單對單教授單車，更與單車燃起熊熊愛火，從平路，斜路，上山頂，青公，飛鵝山，波波一週四五轉一一征服！靚車買完一架又一架最後要租個倉放置單車！更把阿單車教練踢埋入教一齊去鐵人賽益大家！
唔識游水性畜名字教徒起心肝學游水，由用浮板開始半個塘一個塘五個塘一直到廿個塘三四十個塘！
童顏中女同其他教眾更加各自主動編排時間表揾教練教單車教上斜教著 Lock 鞋教一路踩一路飲水，揾游泳教練執泳姿，一星期練三日水踩兩日車跑兩三日步。逢週六 0735 練車週日 0645 Boot Camp 之後又再練水！最恐怖嘅係呢班人並唔係無業遊民個個有正職，一係練完番工一係番完工練一係練完番工放工再練，嗰團火居然持續半年！一班甩皮甩骨嘅邪教教徒運動狂熱份子慢慢脫胎換骨，開始真正成為一班業餘運動員！
知道專業運動員 Professional 與業餘運動員 Amatuer 的分別嗎？Professional 除了技能高超之外，通常係一份具專業水平而有酬勞嘅工作，表現與報酬掛鉤，而 Amatuer 呢個英文字其實嚟自 拉丁文 Amator 同 Amare，意思係 愛同去愛！業餘運動員不單只毫無報酬，反之要付出心血，時間，努力，汗水去鑽研去反覆無數次練習，不為任何物質只因為真心喜愛呢樣運動，明知絕無奪獎機會一樣勇往直前樂此不疲義無反顧，除咗真心愛運動愛挑戰誓要把不可能變成可能之外，本人揾唔到第二個理由！
如是者，半年彈指過，離開比賽仲有一星期……..
( 又未完，又待續！)
更多：
Fitz.hk Facebook專頁
[Road to Ironman] 我加入了一個邪教叫 MidAgeOnG
鐵人之門
[鐵人之單車指南] 裝備正確騎車安全又順暢
美國里奧絕色武器: 註冊會計師
本文屬作者意見，不代表Fitz立場。
