[澳洲墨爾本毅行者] 一支公去澳毅，咩玩法?

Law少許耀斌 2018-03-23

我隊號碼 537 Happy Hikers
Live Tracking：https://trailwalker.oxfam.org.au/my/teamtracker/87
籌款：https://trailwalker.oxfam.org.au/my/donate/payment/30353/297605

自從「獅子山」2017年首次去韓國玩毅行，對海外毅行一直都充滿憧憬，不過去海外易，夾假夾人難，所以把心一橫就決定得一個人都要報。

一步一步就到咗3月23日墨爾本毅行者的前夕，到目前為止，仍然未親身見過隊友同支援，真係到時見。

先講參加方法，搵唔到人同你一齊由香港去其實係正常，我都係因為公司有會在四月，所以順便望，就望到墨爾本毅行。首先你可以喺一個「single board」上留名，列明預計完成時間，男/女/混合隊，個人介紹同期望之類就可以「等運到」，或者勁主動去撩其他擺咗自己出嚟嘅人去組隊。

----- 廣告 Ad -----

其實我都唔知易定難，我都係搵咗一個人問吓然後無 reply 又停咗。呢個係我問題，我一向都係 deadline non-fighter，得就得，唔得就忽得，但我又買咗21號嘅機票。

(按圖放大)

所以決心比一切重要。就喺報名 deadline 差不多到的時候，正值渣馬前被流感擊倒無得跑之際，我就收到喜訊，已經成咗team。神之人物 Natalie 話我知我入咗隊（其實係佢組咗隊，相信佢用心地將不同人組合）

要組成一隊人係非常神奇的事，大家完全唔認識，一碰面就要共同渡過100 Km。第二件事就有人quit。一下子就換咗個有經驗人士 Warren，佢墨毅前幾年都行過幾次。另外 Simone 由悉尼飛過嚟。最後階段又換咗另一位無咩行山經驗又想試毅行嘅媽媽，可惜隻腳一早傷。喺最後換人 deadline 前換成新隊友 Rejieli 一拖二，一對拖友，連埋我地五個上路。

----- 廣告 Ad -----

幾次 FaceTime 都算溝通到，不過當佢地講到 TUB 嘅時候，我真係R哂頭，我唔知點解，我唔開估住，留返用完先再講。另外，support crew 成員各自貢獻，最後有專治痛症的 Carina 醫生 (為獅子山精神隊帶腐竹糖水同辣魚蛋去大帽山搵我哋嗰位) 又介紹咗墨爾本朋友 Cissy 俾我認識 (又係未真人見)，到時負責晚餐部分。

命仔都交在他們手上了。

另外，值得一提係一班捐款支持我的朋友，在樂施會不利新聞之後依然支持我，亦支持了其他在樂施會認真工作的朋友。同時亦明白大家唔想支持亦相當合理。感謝你地兇狠地將善款要求1400澳紙輕鬆打爆，日日睇到電郵 alert 又多咗捐款係好開心。

所以轉帳俾我捐嘅朋友，我決定剩餘捐款放落今年香港樂施會，為我或者我朋友嘅隊伍度，幫手籌錢，因為今年籌款難度一定增加，但我相信一個有心嘅機構，同毅行者精神一樣，都可以迎難而上，互相勉勵。

完走毅行靠訓練，更加靠隊友互相鼓勵、團隊支援，善長贊助，今年獅子山整個團隊預埋你，等你五月一齊報名。

同時預祝逆走100在麥徑的朋友成功。