我身邊好多被我導上癮嘅朋友，都係因為第一次掟鏢就用我套子彈黃銅鏢開始。呢套鏢同公家鏢重量相若，只係鏢身有所不同，不論男女，用一次就覺得掟BULL(紅心)好易，易到個bull好似浴室洗手盤咁大，易上手，掟幾次分分鐘就可以有low ton(01game 中一回合三鏢共打出一百分以上)，甚至Hat Trick都唔奇(一回合內三發均正中bull)。
一支鏢主要由四大部份組成：鏢頭(TIP頭)、鏢身、桿同埋定飛翼(FLIGHT)，任何一部份有不同都可以令成支鏢有唔同效果。鏢身係成套鏢嘅心臟，非常之咁重要，唔計物料單純從形狀分可以分為：
1. 直身鏢：鏢身重量平均分佈，比較平衝，比較多人用(鏢機提供嘅公家鏢”俗稱『公柴』一般都係呢種”)。
2. 酒桶型：鏢身中間比較肥，好似紅酒桶咁款，唔駛搵重心，拎起就知揸邊，唔駛煩。
3. 子彈頭：好似酒筒咁，會有個位比較肥，不過唔係中間位而係前端位置，由於頭重，鏢會比較衝。
掟鏢掟咗9個幾月，一年未夠，唔可以話短，但肯肯定唔可能叫長嘅日子，已經買咗四套鏢，全部子彈頭，試過拎朋友直身鏢同酒桶掟過，直身鏢係夠平衡，但對怕麻煩嘅我而言，下下掟之前都要摸一大餐先揾到重心真係有點吃不消，搞咁多嘢先再掟，咩MOOD都無晒啦！酒桶鏢係唔駛煩，一揸上手就掟到，但問題佢重心喺中間，掟BULL仲好地地，一玩Cricket(想知Cricket係咩有三個方法 1.問人 2.Google 3.等我遲下講)上上落落，瞄左瞄右好易唔知飛去邊。
----- 廣告 Ad -----
子彈頭重心喺前，基本上樁穩，企得好就唔會亂飛，而且唔係直身，一拎上手都知咩應該揸邊。對新手而言，子彈頭都係一個唔錯選擇！Hat Trick 其實就係咁間單！
小明學掟鏢
平凡身手，飛鏢新手。身高比正式規格的鏢靶紅心距離地面還要少，換裝備的頻率比得上女人換手袋的進度。想過一個完美生活，但人生卻如01Game一般，不曾出現Perfect Game；想當白馬王子，但CRICKET不曾打出白馬。