想寫一篇關於支援隊嘅文章,但又諗唔到點開頭,適逢消防處嘅藍色人「任何仁」爆咗出嚟,我先忽然醒起,一年四季嘅支援隊就係消防員,事關太多敢死隊上到山又落唔到山,喺度真係要先向佢地致敬,一個人抽筋拗柴行唔到就變咗一隊人極速爆上嚟救你落山。呢個亦係香港咁多人夠膽死一個人去行山嘅原因,套用電影寒戰句開場白:「香港係全世界最安全嘅城市」,一定係,除非唔係。

上年毅行當日11月17日就有單小新聞係休班消防員行毅行前都仲喺西貢碼頭巴士總站對開過馬路,救返個被小巴撞到攝咁落車底嘅婆婆。人休班你休班,兩種休班人員都幾大反差。

呢個反差同樣會發生喺你自己同你嘅隊友度,因為毅行從來唔係完美 (或者我地呢班人比較hea所以無咩交嗌)。由上年義賣隊衣都聽過一對兄弟加一對 friend,四個兄弟班,自己快嘅時候又唔想等,到自己被人 CHUR 緊嘅時候又覺得辛苦,結果好多時又係各有各行,喺 check point 前見到面都係一肚氣,就算你話剪帶走都無人理你。又例如另一隊條友根本唔想行,開始咗無耐就話 QUIT (明明行到),當然呢d通常係發生喺玩咗N年嘅朋友身上,初衷就好像棵蔥咁切碎伴碟。

獅子山精神隊與及一眾 Support Team 在城門水塘出發之前合照留念 Photo Credit: William

能力強有時心態差,能力延反而心態強,喺山真係好公平,因為毅行唔係半馬全馬幾個鐘點都返屋企,嚟得係要有充份心理準備。揀倒數時間講呢樣嘢係為咗提提大家唔係有經驗就大哂,經驗有時就係負累,最強政績就係無政績,白紙一張最簡單。走得快好少搵人陪,走得「磨」嘅自然會搵人陪自己,就算呢刻同隊友幾陌生幾唔夾都好,搵幾個 support 喺 CP 等你,喺終點等你,至少你都有股動力鼓勵你捱多5KM見到阿A,捱多10KM見到阿B,仲有 CDE 喺終點等,車你返屋企。


上年龜速完成,但依然 full team 就係靠三個關鍵位:

  1. 兩個 support 夾一個陪行通宵三四
  2. 城門水塘有三十個人喺度等
  3. 十幾個人陪行九、十

呢個 support 可以係「任何仁」,亦唔止係「任何仁」,老公由老婆喺CP等,喺終點等,唔好話跪著也要完成,而係跪著玻璃也要完成啦。

今年操山,喺大帽山蓮姐度support 吉野家

練得少,當然係高危
不過夾得少,先係超級危,所以又要快又練得少又夾得少嘅後果可想而知。

最後呢三句歌詞贈大家

當一切完全不像你預期
才明白不可心死 沿路再走幾千公里
要做最好的你

支持獅子山精神隊 1017打爆$36000
出年延續 行一次 記一世嘅精神
捐款連結 (編號1017)

>> 更多獅子山精神隊的故事,見《[獅子山精神隊] 一件tee 一個故事

有一班行山友叫「獅子山」Facebook專頁

Fitz連結: https://fitz.hk/?p=106993


更多:
Fitz Facebook專頁
[獅子山精神隊] 山上有味話題 (毅行倒數14日)
[獅子山精神隊] 無腳的雀 Flori (毅行倒數第15日)
[獅子山精神隊] 遲到正烏龜隊 身袋5L水的少男Ken (毅行倒數第16日)
[獅子山精神隊] 文青音樂人上山 Ka Ming (毅行倒數17日)
[獅子山精神隊] 轉個彎就到隊隊友 Sharon 一月一賽 走上毅行 (毅行倒數18日)
[獅子山精神隊] 回應了上年期望的隊長Jacky (毅行倒數19日)
[獅子山精神隊] 女版張智霖Cathi登場 (毅行倒數20日)
[獅子山精神隊] 轉個彎就到隊 隊友阿鈞: 一年前點解走去玩毅行 (毅行倒數21日)
[獅子山精神隊] 遲到正烏龜隊最烏龜隊員HINSON: 喂! 落山後一齊雞煲! (毅行倒數22日)
[獅子山精神隊] 黃宗顯醫生Willy 毅行後一年 (毅行倒數23日)
[獅子山精神隊] 鋒哥定波波出場 (毅行倒數24日)
[獅子山精神隊] 遲到正烏龜隊隊友Grace感言 (毅行倒數25日)
[獅子山精神隊] 隊號1017 呢班隊友一年前做緊咩? (毅行倒數26日)
[獅子山精神隊] 今個星期六你嚟唔嚟行山? (毅行倒數27日)
[獅子山精神隊] 友情分水嶺 2017年隊友 Raymond (毅行倒數28日)
[獅子山精神隊] 友情分水嶺 (毅行倒數29日)
[獅子山精神隊] 一件tee 一個故事
Fitz Hiking 行山

廣告
Law少 許耀斌
人稱Law少,前電台主持及監製,酷愛體育運動,多次參加馬拉松及毅行者活 動,近年更嘗試進軍三鐵及渡海泳。對於跑步、對於行山、對於比賽,均有深刻而令人動容的看法。著有《原來在沒有盼望 的地方才需要盼望》。