[獅子山精神隊] 女版張智霖Cathi登場 (毅行倒數20日)

Law少許耀斌 2018-10-27

字 Decrease font size. 字 Reset font size. 字 Increase font size.

睇返電話相簿，我諗2017年嘅「Best Nine」大部份都係毅行嘅相。2017年係我嘅人生低谷，畢業待業又失戀，一個迷茫90後。人生第一次毅行我草咗有血有汗嘅100K里數，換到一班真 · 朋友，佢地真係顛架! 正能量多到成年都喊嘅我忍唔住笑。2018年，第二年毅行，我都成為咗癲友一名，傳播瘋癲益菌。

事源上年暑假，得悉公司有毅行 quota 又冇女仔行，我覺得自己冇咩輸，就膽粗粗話:「我去!」於是，無咩行山經驗嘅我就跟咗班「師傅」(代表公司行咗好多年毅行) 8月中去試山。冇錯係8月中! 毅行倒數3個月。

----- 廣告 Ad -----

吓! 第一次就叫我行針草帽? 結果，行針山已經氣喘到停咗好幾次，水又帶唔夠要問人借，我被勸「早啲返歸，唔洗行大帽山啦!」個一刻再一次覺得自己好無用，又跌返入谷底，不過我輸剩一份固執。堅持係一種任性「我想行，俾我跟呀!」，最後，我朝早行完下晝如常返工，好 tough 的一天。但經過呢一日，我就被批准正式可以行毅行啦! Yeah!

圖騰是最後的操練，平時當行山只係郊遊嘅朋友咁都陪我行咗一半路程，雖然係俾我呃咗上山，但都係一次好癲的體驗。另外，同事上司知道我要毅行，好擔心不斷問「真係得?」「100K喎唔係玩架呀妹!」最後，毅行者當日佢地身體力行陪我行咗9、10段，幾個自開始工作之後都冇做過運動的人竟然陪行咗 20k，痴線架。

我同一個毅行 Buddy 都係可以用「癲」字嚟形容。毅行到了一半路程唔小心拗柴，雖然我都有半途受傷，但佢嚴重好多。本應意志薄弱嘅佢，無將呢個意外成為放棄嘅藉口，食幾粒Panadol撐到最後，同我地一起衝線。

我嘅人生第一次毅行成績係1.5日，34小時賺咗100K里數。34呢個數字對我嚟講好鼓舞，因為真係好攰好辛苦好眼訓，但更大嘅得著係我用呢啲里數換到一班顛嘅朋友，真正用行動對我好的朋友。

毅行試過一次會上癮，係真的! 2018年我又繼續任性，唔理屋企反對參加毅行。今年我自己都成為咗一名顛友，一有時間就係在山上，周圍約朋友操山，有興趣的就可以加入。結果，操毅行就成為咗大家各帶朋友互相認識、一齊出汗嘅歡樂「膠遊團」。

一山還有一山高，獅子山精神隊係我認識最癲的一隊，其中一個隊員 Grace 係我的中學同學，唔同級無交流所以畢業後只係在 Facebook、Instagram 得知大家近況嘅「朋友」。真正認識係8月有一日我收到一個message「你今年都毅行呀? 一齊操呀喂！就下星期日第6、7、8段。」然後，我同 Grace 就真真正正第一次見面啦，除咗隔咁多年終於做到真正嘅朋友，個一日我仲一次過認識到好多癲友！有行咗十幾年毅行嘅「老屎忽」Law少、一個唔行毅行但俾 Grace 邀請嚟嘅新同事 (仲要識咗幾日咋)、一個自畢業都無見過真人嘅中學老師 (而佢係平時係好少行山的)、一個上年著拖鞋行毅行的計設奇人、一位每月都有100k 山賽嘅勁人、一個拎住十個叉蛋飯盒接我地嘅 Support Buddy……全部都好癲呀! 接下來，每次同佢地操山已經成為咗習慣，而每次見面都會認識到包羅萬有嘅新同伴。

----- 廣告 Ad -----

我認識的獅子山精神隊係一個唔止四人的隊伍，係一個包容力同治癒感特強嘅大家庭!

撰文: Cathi

Law少呼籲: 今年大家可以直接支持今年毅行隊伍編號1017 ，或者有興趣就睇下面賣番件Tee:

『築字室』設計師方立一為獅子山精神隊設計一款兩色的隊衣，除了經典『獅子山』及『向高山舉目』墨寶，配合毅行路線圖，加上男女裝前後皆可拼成整條路線，扣除成本後會將捐款全數捐給樂施會，希望打爆籌款數字，首批隊衣預期在毅行比賽前送上。