帶定頭盔,唔講得笑就唔好睇喇,有人話幽默總帶點自嘲,希望我地呢班人自己互相笑吓,你接受唔到無謂勉強。

其實用 disclaimer 開個頭一啲都唔過癮,不過有味話題本身存在就不失雅興,而且極有智慧。話說上星期練山,平時跑開步嘅「轉個彎就到」隊員 XXX 好似墮後咗,原來係「大脾」,男士們呢個時間齊齊點頭,開始研究緊條褲係咪太新? 內膽係咪三角款? 平時係咪都會? 而最重要係形容受傷部位時,大家都用「大腿內側」,呢個可謂中文修辭手法中嘅借代,借一個位講一個位,而幾乎咁多年同場女士都會問「大腿內側」點解會損架/ 男人條大腿同女人條大腿有咩唔同呀?

睇到呢度,就知道下一刻係真心話定大冒險時間: 如何令異性明白我地個痛處呢? (戀愛中的問題一樣) 尤其喺佢地百思不得其解嘅表情當中表現「我地從來行山大腿內側都無問題」同充滿關心嘅態度。

你會……


我當時幾乎想為大家上一課大腦盲點課,意即你太關注大腿其實係其他部位嘅問題,情況就好似叫你注意片中人表演魔術之際,就算有隻猩猩行過你都唔會發現。

然後我用非常直率嘅態度講個位唔係大脾內側,係「袋底」,跟住 AAA 就即刻猛然驚醒同閃走咗 (人類就係接受唔到真相),其實再準確啲講應該係「袋邊」,而呢個位係男士們都係心照就算,相信無人會直接檢測你條邊係咪 exactly 同我條邊係咪一樣 (除非係泌尿科)。

可以繼續討論而且又有中醫底嘅 BBB,就失驚無神 (因為太驚嚇唔記得咗前文) 指住我手揸嘅一支許生士多豆漿話:「成支淋精」。我開頭都未「消化」到係咩? 原來正解係患淋病時嘅分泌,但正名係咩講堅真係唔知。

然後我就揸住支「淋精」上路,繼續討論女人唔明男士山中痛苦,而其實男人亦唔知女士帶住姨媽上山又係咩玩法。BBB 呢個時候又憶述曾經請教曾燕紅老師上珠峰時姨媽忽然探望咁點算,曾老師就以個人而言係神蹟云云,所以無遇到相關問題。

我又憶述都「見證」過女隊友 CCC 外地毅行,出發前一晚親戚強行探望,勉強出發,嗰重尷尬情況,難以想像,呢啲情況女士尤其怕。

男女大不同,山中都適用,到其他地方毅行嗰陣竟然提供整條青瓜,女隊友 DDD,大讚好食,仲要影相,大家都忍唔住爆笑,講真,好少見人 (女仔) 成條啪。但最估唔到嘅係最敦厚嘅少男隊友 EEE,竟然鉅細無遺用青瓜、有皮香蕉同脫皮香蕉嘅比喻為我地重溫一課淺談泌尿科。

同樣嘅話題喺酒吧同喺山度講真係兩個世界,喺酒吧係為笑為 flirt,喺山為頂眼瞓為講講吓就過,為完成目標,增進感情,係有味亦又汗味。

獅子山精神隊

最後,等我再寫一段 disclaimer 啦

點解山中話題經常有味,離不開屎尿屁同衛生問題,借用澳門 UTMB 女將 Vivi 衝線片段嘅一句「兩天無洗澡和刷牙呀,我的口好臭呀」,上到山,生理至上,有得食有得飲行得郁,實在要感恩。君不見幾多師兄蟹腳前行,有苦自己知。

最後叮囑各位,如果你啲隊男女失衡就要小心,有啲料師兄過唔到俾師妹,師姐過唔到俾師弟,睇路呀,唔識問叔叔啦。

支持獅子山精神隊 1017打爆$36000
出年延續 行一次 記一世嘅精神
捐款連結 (編號1017)

>> 更多獅子山精神隊的故事,見《[獅子山精神隊] 一件tee 一個故事

有一班行山友叫「獅子山」Facebook專頁

Fitz連結:  https://fitz.hk/?p=106663


更多:
Fitz Facebook專頁
[獅子山精神隊] 無腳的雀 Flori (毅行倒數第15日)
[獅子山精神隊] 遲到正烏龜隊 身袋5L水的少男Ken (毅行倒數第16日)
[獅子山精神隊] 文青音樂人上山 Ka Ming (毅行倒數17日)
[獅子山精神隊] 轉個彎就到隊隊友 Sharon 一月一賽 走上毅行 (毅行倒數18日)
[獅子山精神隊] 回應了上年期望的隊長Jacky (毅行倒數19日)
[獅子山精神隊] 女版張智霖Cathi登場 (毅行倒數20日)
[獅子山精神隊] 轉個彎就到隊 隊友阿鈞: 一年前點解走去玩毅行 (毅行倒數21日)
[獅子山精神隊] 遲到正烏龜隊最烏龜隊員HINSON: 喂! 落山後一齊雞煲! (毅行倒數22日)
[獅子山精神隊] 黃宗顯醫生Willy 毅行後一年 (毅行倒數23日)
[獅子山精神隊] 鋒哥定波波出場 (毅行倒數24日)
[獅子山精神隊] 遲到正烏龜隊隊友Grace感言 (毅行倒數25日)
[獅子山精神隊] 隊號1017 呢班隊友一年前做緊咩? (毅行倒數26日)
[獅子山精神隊] 今個星期六你嚟唔嚟行山? (毅行倒數27日)
[獅子山精神隊] 友情分水嶺 2017年隊友 Raymond (毅行倒數28日)
[獅子山精神隊] 友情分水嶺 (毅行倒數29日)
[獅子山精神隊] 一件tee 一個故事
Fitz Hiking 行山


文章為作者意見,不代表Fitz立場。

歡迎投稿: https://fitz.hk/contribute/

廣告
Law少 許耀斌
人稱Law少,前電台主持及監製,酷愛體育運動,多次參加馬拉松及毅行者活 動,近年更嘗試進軍三鐵及渡海泳。對於跑步、對於行山、對於比賽,均有深刻而令人動容的看法。著有《原來在沒有盼望 的地方才需要盼望》。