完成時間為29小時55分40秒，達成目標!
支援隊 支援隊 支援隊。。。
一個參賽者願意行100公里，行到力竭，腳底長滿水泡、周身筋骨勞損、曬傷，你都唔會覺得佢係奉獻緊，因為佢係為自己，去完成一個目標，去幫自己攞一張身份證。極其量係美其名要兌現向捐款者嘅承諾。
但係一個支援人員去捱更抵夜，左撲又撲，塞車爭位被抄牌，幫污糟邋遢兼臭崩崩嘅人按腳，好似做奴婢咁，仲要出錢出力，跑終點嘅時候冇佢份，證書上面無佢名。
他們才是真正的奉獻。
----- 廣告 Ad -----
所以首先要多謝這班無名英雄：Eric、Kaluen、Sam哥（許培道）、松哥（洪松蔭）、PT、Stella、Karen、Cherry
Sam哥和松哥的專業級按摩，係我哋嘅秘密武器
今朝起床反思，發現沒有他們做的每一樣事情，結果就不一樣了。有咗佢哋嘅奉獻，我哋先可以無憂無慮咁完成我哋嘅目標。
感激。
抱歉名單未能盡錄，感謝每一位支持我們的朋友
----- 廣告 Ad -----
捐款者 捐款者 捐款者。。。
首先感謝身邊嘅朋友，因為佢哋一聽到我要參與毅行者都自動攞銀包，唔係多謝你哋嘅錢，因為錢唔係入我袋，係多謝你哋對我嘅肯定！
仲有好多人靜悄悄的上到隊嘅樂施會網站捐錢，500、1000咁捐，甚至不留名。
你哋嘅肯定令我覺得付出嘅價值。
感激。
隊員 隊員 隊員。。。
一個多月時間練習，大部分人都會覺得你條友仔唔知死！的確。。。我真係唔知死。
但幸運地我有兩個經驗老到嘅隊員夏威、Law少、同一個深不見底嘅體能王Bonnie，最重要嘅係可以鞭策我。
老實講，很痛苦。。。我對自己嘅肌肉能力充滿信心，裝備亦係最好，但有啲嘢真係要用時間訓練回來，冇得走捷徑，腳板底嘅受壓能力就係其中一樣。
同踩單車個鐵patpat，打排球嘅前臂一樣，要經歷不停嘅鑄煉，先能夠成鋼，而呢樣就係此行唯一的最大阻力，腳板底超痛！
眼瞓、攰、肌肉酸痛、皮膚磨損、日曬雨淋、溫差都不成問題，但係腳板底痛就一步一入心，所以去到大帽山一段，其實已經好想放慢腳步，由得自己慢慢行頹廢下去，但好在去到Support位置，支援隊又記一功！因為信心又回來了！呢個時候加上松哥洪松蔭嘅陪跑支援下，我哋又決定重新上路，趕上目標時間。
平時跑十公里真係完全冇問題，但當時咁嘅狀態之下，要跑十公里真係人都癲！
跑唔夠四公里，我發現剛剛支援位置食咗嘅滑雞飯已經消失咗，開始肚餓。。。腳趾間嘅花士令又無晒。。。腳板底唔洗講水泡已成，真係十級痛苦。
到最後3-4公里，因為肚餓關係，開始手軟腳軟兼頭暈，但又唔可以停。。。因為離目標時間只剩下15分鐘！
----- 廣告 Ad -----
如果無隊員嘅鞭策，我一早就放棄咗，所以多謝隊員沒有放棄對我嘅信任！
講到支援精神，其實除咗人之外，有啲品牌亦非常有心，願意對我地作出支持，真係十二萬感激！
Newline:
功能同外表一樣注重，顏色真係配搭無得頂，我完成全程毅行者無換過條褲，全程著到尾，咩問題都無！超讚！
Raidlight:
講到功能無見過其他牌子夠佢細心，而且非常輕！兩支行山杖救咗我命幾次！
Biotherm：
行山必備，防曬！身為一個處女座，我其實好怕搽太陽油。。。因為每次都黐立立，又難聞。呢隻防曬係第一隻可以令我感覺良好嘅防曬。
Azzaro:
體味真係好重要架。。。你行過毅行者上山跟喺其他臭男人後面你就會明白。。。個陣味聞著上山，有力都變冇力！返到嚟沖個靚涼，香噴噴。
ANS:
行毅行其實好多嘢食，但係你會見到好多人食飽飽轉頭一上山即刻嘔返晒出嚟，因為根本無時間消化！一包powergel有五百幾大卡，快食快吸收，好重要！唔好晒能量去消化個叉雞飯。
呢啲係上次單車環島食剩嘅，ANS又幫一個忙。
感激。
最後，仲要多謝埋樂施會。除咗搞了毅行者呢個活動，仲俾Fitz成為今屆Official Media Partner，實在萬分榮幸。
總結：
咁究竟我仲會唔會再玩毅行？ 嘿嘿。。。
「行到邊，總有夥伴喺身邊」
“Side By Side, Together We Thrive”
Fitz全力支持樂施毅行者2015
----- 廣告 Ad -----
#Fitz.hk為樂施毅行者2015媒體伙伴
更多：
[Fitz出戰毅行] 痴線，我永遠都唔會行毅行!
[毅行之後] 回復身體疲勞的法寶
[Fitz出戰毅行] 起步嘞! 係講多謝嘅時間
Fitz出戰毅行@Fitz.hk
毅行者@Fitz.hk
Fitz Hiking 行山
