[獅子山精神隊] 鋒哥定波波出場 (毅行倒數24日)

前排大頭就是今次為大家分享的鋒哥

一切都由毅行體驗 — 第0課開始

「毅行咩黎架? 食得架?」一年之前，我真係唔知道咩係毅行者。女朋友話舊同事約行山，問我有冇興趣一齊，當時既我，自覺都叫做行過下山 (龍脊，浪茄等)，咁我當然答無問題啦。咁就開始左我踏上毅行之路既第一步……

當日2點左右出發，原來我地係由水浪窩開始行，而我亦都無問過終點係邊，因為心諗最多咪行3-4個鐘，天黑前落山。行左無幾多分鐘，已經落雨，仲越落越大，雨褸? 緊係無啦。開左個頭，亦已經無退路，緊係繼續行埋落去啦，一路行，望住石屎路，我已經成日問係咪成段都係石屎路架? 我係行山緊係要山路既一類人黎。好喇，話都無咁快就比山路我行喇，望一望，原來已經變成泥濘滿佈，起初我都搵啲比較乾爽落腳點，不過好快已經克服問題，就係完全無視水氹……好快，螢光色既鞋已被泥濘侵蝕。

時間流逝，已經開始天黑，感覺仍然未到終點! 心諗，仲有幾耐先到，好想返去沖涼。最後，我地一行好多人，終於去到扎山道觀景台 call 的士走人。但係去到觀景台，望落去香港夜景，真係好靚好感動，行咁耐係值得架!

隨著之後「行山」日子增加，我都成為了上年0927「20+N隊」既一位打算陪行3-10段既 support，但可惜出師不利，隊友受傷未能完成賽事既關係，第一次既陪行計劃告終……

到左今年，佢地4人復仇心切，比佢地抽到4籤，比佢地復夠4次仇。咁我都成為其中一位隊友，出一分力，今年行山非常勤力，見到大家同埋自己行每一段都有進步，就好想可以快啲行毅行，以前覺得點行呀咁多段，一百公里山路喎; 經歷4-5個月以黎經常性既練山，雖然我唔知最終我行成點，但我對毅行行十段麥理浩徑既概念係: 1-4段係就係長，但係就係你體力最好既時間，即係其實唔難啦；而5段係兩三個鐘既事，好快姐; 6段一個鐘KO; 7-8段行到熟哂，每次行都會大概知道仲有幾多路，唔難行既；咁都行到9-10，頂埋佢啦! 咁就行完了，當然仲有強大既 Support Team 支援先成事啦!

最後，好希望今年隊隊人都可以平平安安順順利利行哂十段，記住人無事先可以做到世界冠軍架嘛。

如果想支持鋒哥，都可以喺買 tee 時，留介紹人係鋒哥。

『築字室』設計師方立一為獅子山精神隊設計一款兩色的隊衣，除了經典『獅子山』及『向高山舉目』墨寶，配合毅行路線圖，加上男女裝前後皆可拼成整條路線，扣除成本後會將捐款全數捐給樂施會，希望打爆籌款數字，首批隊衣預期在毅行比賽前送上。

如果你都想繼續支持我地，等大自然親手悉心改變更多人，請你捐款或買隊衣支持我地。

以下係訂購表格，詳細可以了解吓，唔明可以搵 Law少。

** 訂購連結 **

>> 更多獅子山精神隊的故事，見《[獅子山精神隊] 一件tee 一個故事》

有一班行山友叫「獅子山」Facebook專頁

Fitz連結: https://fitz.hk/?p=105828