人生總是上斜落斜轉個彎未到 | 梁影雪細訴跑步成就了和耽誤了的事情

孫立民 2024-07-29

----- 廣告 Ad -----

阿雪:「如果從來冇跑步，我會好後悔」

每個人都有其人生的風眼，人生的種種規劃，幾時結婚幾時整個B? 去南丫島定冰島旅行? 同唔同方丈反枱等等，都只是圍繞和配合這風眼而轉。有些人的風眼是仔女、或事業、或財富、或權力、或沙田第一城的兩房單位。

小學階段的梁影雪，有一日忽然發現自己跑得好快，自此「跑」漸漸形成了阿雪的風眼。阿雪大約是與 JoeJoe 和周佩欣同期的跑界前輩，叫得前輩，即經歷了很多人生的上斜落斜片段。

曾是田徑港隊成員、10K跑過37分、全馬做過sub 3 (2:58，2009)、代表過香港參加越野世錦賽的阿雪，也面對過生命中不能承受的輕和重，或多或少都與跑扯上了關係 -「阿雪，跑步成就了和耽誤了你乜嘢?」、「如果係呢一刻做個小結，你的人生 balance sheet 是盈或虧?」阿雪咁樣答……。(好學唔學，學埋呢啲下三流表達手法。)

----- 廣告 Ad -----

約阿雪行她的街坊線，由明愛醫院上大埔道，穿過呈祥道的黃大仙元清閣、走鷹巢山、畢架山、返回李鄭屋邨，重點是在東京街意樂餐廳 tea。知，得5K幾，大佬，34度，想點，虐老咩！

唔好以為又是飲食訪問，堅有去行山的，只是忘記了影相，唔記得嘢呢個年紀是日常。

小學跑得快，一定有古怪

「小學時老師揀選同學去參加學界的60米田徑賽，我好想被選中，因為代表學校去比賽就唔洗上堂。」小學跑得快，一定有古怪。
「你係唔係坐唔定、過度活躍果啲學生?」諗起鷹鷹 (曾進傑)，以為細個跑得快的都是A仔 (ADHD 專注力不足及過度活躍症)。
「唔係，我好乖好聽話㗎。」阿雪好緊張要澄清，免得被歸入鷹鷹類別。

「中學主要跑中長距，400、800米等，中一破左學校400米的紀錄，也攞過全場總冠軍。」

「我好記得一件事，中三時老師向我說會挑選我入學校的田徑隊，我超興奮。早會老師當眾宣佈那些同學會代表學校參加田徑比賽，竟然冇我份，以為老師講漏左，小息去問老師，老師話我陸運會輸左俾高年班同學，所以最後冇揀。那刻真係好大打擊，當時老師講的每一句話和面部表情，我到而家還瀝瀝在目。」成年人的輕，是小孩子的重。

----- 廣告 Ad -----

經過暑假自我艱苦操練，中四獲全場總冠軍。美麗，是那種不認輸的決心

「於是放暑假時，每日5點半起身，去等深水埗運動場開門，每日衝4個圈，到了中四的陸運會，我在400、800、1500、4×400全部贏晒，攞到全場總冠軍。果時我係唔輸得嘅人。」一吐汚氣的阿雪，當然被召入校隊，在學界逐鹿。大家要記住，欠阿雪的（包括飯錢），一定要還。

「因為屋企只得父親搵錢，有經濟壓力，我中學畢業便出來工作。」確信阿雪真係好乖。「後來重遇中學的田徑隊員，佢哋介紹我入愉園體育會玩中長跑。過了兩年，轉了去公民體育會同荃灣田徑隊，主力操800和1500，也開始接觸公路賽同10公里賽道。」

剛加入愉園體育會時的「肥雪」，阿雪話掙扎咗好耐先send俾我 (每次訪問我都問被訪者攞當年的肥仔/妹相。為了流量，我乜嘢做唔出)

阿雪每天返工背著大包小包的運動衫褲和跑鞋，放工同事可能忙於返家料理家務，或與 friend 找「阿樂」，她沒有join同事的飯局，總是去了運動場找「阿跑」，是唯一的娛樂。一步一步在衝，一圈一圈在轉，跑的風眼慢慢成形，或多或少，吹走了許多其他多姿多彩的生活片段、或那年紀需要發生的事。

在Nike跌底，在Nike起身

「約2000年我參加『Nike香港 10公里挑戰賽』，當年是10K的光明頂，最Top的跑手都落場砌，有李致和、陳敏儀等，佢哋都係Nike Team。記得那時沒有chips (要到2003時才有)，臨衝線前，工作人員會派定一張寫上名次的咭仔俾跑手。衝線後獲組別頭10名的可等候領獎。」

「我跑48分，但等衝線又加多約2分鐘 (因為太多人一齊衝線)，當然唔入流，但卻獲派一張組別第6(或第7名)的咭，雖然一邊不太相信，但一邊又十分興奮。當聽到叫我個名出去領獎時，超開心，當年全場總冠軍是陳敏儀。返到屋企，把獎品放係床頭，與中一時首次陸運會獲得的獎座一起，同我一齊瞓覺。豈料3日後卻傳來噩耗，有工作人員打電話俾我，話唔好意思，頒錯了獎，要交還俾大會。」

左二是阿雪，好小妹妹(當時未知頒錯獎)。冠軍位置的是當年跑界女一陳敏儀 (好有大佬feel)，此時大家還有段距離。數年後，阿雪已可以站於敏儀身旁，成為亞軍

「那刻雖然好失望，但覺得個獎不屬於自己，應該交回。不過我向個獎座發左個誓，終有一日我要用成績攞番呢個獎。」洗唔洗咁認真，求其話俾「東張西望」知咪算。

有圓夢的動力，跟著阿雪的10K時間大躍進，45、44、43。2003年，她在Nike 10公里賽跑進41分，獲得組別的第6 (或第7名)，名正言順上台領獎。「睇番張相，見到周佩欣同樣係台上，佢大我3年，所以大家同組。」

----- 廣告 Ad -----

2003終於憑真正的實力站於台上，與周佩欣(右一)同台，已經去到外星人級數

到了2005年的Nike賽，阿雪跑出37分，以全場總冠軍站於台上。由48分到37分，是一條「實力 x 性格」的路。2007年，阿雪仍以37分完賽，雖然屈居全場亞軍，但站於她旁邊冠軍獎台上的陳敏儀 (35分)，是香港女子10,000米紀錄保持者 (32:39，運動場時間2002)，而公路10K是潔貞所創的紀錄33:52 (2016)。陳敏儀現在仍是5000米 (15:45) 和1500米 (4:21)的紀錄保持者 (阿雪話陳敏儀是唯一一個潔貞贏唔到嘅女長跑手)。能與田徑巨人同一賽道，站於相近高度的頒獎台，阿雪感到無比的夢幻和滿足，晚上可以與置於床頭的獎座甜睡。

傷患是運動員的last dance?

阿雪是2004、05及08年渣馬女子10K公開組冠軍，當走向頂峰之際，傷患總是來邀你共舞。「2007是我10k的最佳時間，但左邊梨狀肌開始隱隱作痛，是累積而成的拉傷。果時冇傷患經驗，冇爭取時間休息，好番少少立即去跑番，繼續高強度訓練和比賽，冇機會令傷患好好康復，於是原本冇事的腳也受牽連。成績也逐步滑落。」派對即將完結嗎? last dance的時間到嗎?

2008渣馬10K冠軍，左邊是潔貞妹妹(少女到)，歷史話俾我哋知，快過潔貞是要還 (第3名應該趕住有約會)

「我覺得差不多每十年好像是一個階段的完結，也是另一個的開始。2013年幫朋友做毅行者 support，開始接觸越野跑，係時候轉場。越野跑我係新仔，我好享受呢個身份，對山界好多事情都感到新鮮同好奇，新仔有做錯事做得差的 quota，冇乜包袱，不是要每次落場要上台領獎。」阿雪雖然也被傷患困擾，她轉場再玩，不介意從 nobody 開拓另一宇宙。

第四屆香港越野跑頒獎典禮2019阿雪獲最佳女運動員 (估計右邊的Jacky是頒獎嘉賓)，2005-07連續3年她獲香港業餘田徑總會頒發傑出女運動員獎，跑后當之無愧

2017 年她與鷹鷹、浩聰、五金 (鄧晨金)組成「猛獸與美女」隊參加毅行者精英組，以12小時51分勇奪全場亞軍，更打破男女混合組別紀錄，比全男班的季軍 Hong Kong Sports Clinic x Salomon 還快35分。與猛獸同 team，阿雪相對是最慢的一位，於是三位男隊員輪流用繩拖阿雪上山，賽前鷹鷹還特訓阿雪落山的弱項。有三猛獸在身旁服侍，娘娘也妒忌。

破紀錄的一役，三頭猛戰為一美女護航，全勝娘娘收的兵

「最近膝頭痛左幾個月，年頭照磁力共振，發現半月板撕裂，渣馬之後停左休息，有少少進展，但落山都係未得，不過醫生話未需要做手術住。」

「如果傷患慢慢康復，我會轉場去番路跑，因為路跑唔洗落山，容易適應。跑馬定短途，一切要視乎復元情況，越野跑2013到2024，可能是另一個十年循環。」阿雪相信命運，也不相信命運。「我希望可以跑到50歲 (以外星人披醒)，跟住就可以放慢，享受比賽，做另一些事情。」

絕對要跑到50歲，因為追巴士是一生的志業

----- 廣告 Ad -----

「有冇諗過創立個跑班，自己做教練?」
「唔會啦，我唔想有咁大壓力，行開下去旅行都要諗下點安排啲學生。我鍾意打工多啲。我而家有幫「猛龍長跑隊」(視障和聽障人士組成)、家豪 (樂家跑會)、火車站 (林成業) 教班。有些學生好熱血好信任我，好開心，好似見番當年嘅自己。」這是做承傳工作的滿足感，老，唔一定廢。

阿雪一定係好老師，一定備課充足，一定準時落堂

連明周娛樂版都上埋，俾條生路後輩好喎

三場世錦賽三段人生的高山低谷

「2018年有一日田總突然搵我，話我同小強係香港 ITRA 最高分數的男女越野跑手，邀請我哋代表香港出戰世界越野錦標賽 (西班牙Trail World Championship, TWC 85公里)。想不到相隔12、3年後，我仍然可以繼香港田徑隊之後，再次披上港隊件衫出戰，有一種失而復得的興奮。」港隊身份永遠令人熱血沸騰。

相隔12、3年，能夠再次代表香港出賽，阿雪創造了兩個宇宙 (小強你洗唔洗咁興奮)

「2019年轉為舉辦選拔賽，我同浩聰勝出做代表參加世錦賽 (葡萄牙45公里)，我同佢都係當年ITRA香港最高排名。那次過程順利，覺得發揮得唔錯。比賽期間不停接到細佬問我幾時開跑幾時返港，我仲以為細佬突然咁關心我。當我回港才知道媽咪在街暈倒，撞親個頭入院，情況嚴重。細佬知道消息一定會影響我比賽，所以一直沒有透露。」其實細佬真的關心家姐。

雖然港隊人丁單薄，227、228加油呀

有一位好關心愛護家姐的弟弟，讓阿雪可以安心比賽

「我即刻拖埋個喼趕去醫院，阿媽已經危殆，當晚要開腦做手術，好危險。手術暫時保到條命。爹哋喺阿媽出事之後一年走左，阿媽半年後都去埋。那幾年對我有好大轉變，同細佬輪住去醫院同阿媽傾計，按摩下啲關節，企左兩個鐘好攰，好辛苦。又要申請好多服務搞好多手續。我哋住嘅大廈冇電梯，阿爸行動不便，又要搬去有電梯嘅大廈。返到屋企成個人散晒，已經冇力同心情再去操練。」

「我一直與父母同住，佢哋好短時間內相繼離去，屋企得番我一個人，有時會覺得好lonely，都想有個人陪伴，要慢慢接受同適應呢個轉變。」知，明白。

「2019年後因疫情停辦，到了2022年再搞選拔賽，好記得全個過程同敏怡拍住跑，不停拉鋸。佢落斜超快，一定會爬我頭，但我上斜又會超越番佢，在八仙嶺一段山峰起起伏伏，我哋兩個經常一前一後你鎅我我鎅你咁跑，好剌激。」最後阿雪以7小時3分59秒奪冠，敏怡遲她6分鐘到達。在香港，相信好難有女跑手能夠在終點等敏怡衝線。」

上山，阿雪就會過敏怡，落坡，敏怡又會在她身邊如風飄過，人生幸有這樣的對手

世界山徑越野跑錦標賽 2022，五名香港代表，是陣容最龐大的一次，感激總會

「去年嘅選拔賽，賽前一星期發燒，可能中左新冠或流感。我對藥物敏感，所以冇食藥，要等慢慢退燒。到左星期四退了燒，但仍然好虛弱，跑幾K都腳軟軟，冇好好操練。比賽當日表現差，只能第三名衝線。」阿雪落得場就要準備充足，第三名都唔會原諒自己。

跑步成就了和耽誤了的事情

「阿雪，你一生花左好多時間跑步，如果今日截數，你張人生 profit and loss statement 會係正數定負數?」
「正，一定係正數。我廿多年的跑步生涯遇過許多的高高低低，學到好多東西，最重要係逆境時，會用跑步嘅意志去面對，唔會咁易 DNF。我相信一個人係運動方面所培養出嚟嘅態度同精神，可以應用係其他生活層面。」

「另外係跑界識左一班好正能量嘅跑友。我係比較負面嘅人，有時會冇乜自信，同佢哋交往，被佢哋堅毅嘅精神感染，令自己有信心去面對挑戰。」

呢樣絕對認同，我經常覺得他們是生活在地球的異能人，放工就變身換上條T7褲，無懼風雨野豬，閒閒地跑2、30K至愛回家。他們的特徵是似長期營養不良，黑、瘦，體脂低於12巴仙，參考樣本: 戰神、怪獸 (叫得呢啲名都唔慌會係地球人。)

「咁有冇乜嘢係被跑步耽誤了?」
「我要諗下先…….，我諗跑步耽誤左旅行，我真係好少放大假去旅遊，我舊年至係第一次非因公事去日本，純粹旅行，我同自己講，一定唔可以帶跑鞋。」

「另一樣係愛情。我到而家都係單身，因為冇時間冇機會去發展一段關係，我做事太專注，投入了就唔會再諗做其他事情。每場比賽我會做足準備和操練，完賽又想爭取時間休息，跟住冇幾耐又有下一個比賽。」其實阿雪也正談一段轟轟烈烈嘅戀愛，有矢志不渝的付出，也有甜美動容的回報，她對跑是永遠著迷。

共同走過了24個春秋，不離不棄，跑步永遠是阿雪的情人 (HKAAA)

「咁有冇乜嘢事情耽誤左跑步?」
「唯一耽誤左跑步嘅就係傷患，不過如果我跑步係一帆風順，連傷患都冇，我唔會轉場去玩越野跑，亦唔會有機會兩次成為港隊代表。如果從來冇跑步，我會好後悔。」我未必會後悔，但一定會肥。

都係果句，上天關了你一道門，又會開留番一扇窗俾你 (費鬼事又收到你投訴或者出post放負插上天。)

彩蛋 – 我最喜愛的跑手

「係香港你最欣賞邊幾位跑手?」
「我特別欣賞鷹鷹，佢頭腦清晰有分析力。毅行破混合隊紀錄果次，中途大家覺得都係破唔到。但出左環塘剩番約10K，鷹鷹計過數話有機會，鼓勵大家拼盡試下，結果真係破到 (12:51)，比舊紀錄快了1分鐘 (12:52)。鷹鷹總係享受比賽，我唔同佢，我想做成績，鷹鷹係隨緣。」但佢隨緣得嚟又做到成績，咁至乞人憎。

幾位親密戰友，阿雪經常從他們得力。話時話，大家有冇鷹鷹唔整古做怪嘅相

「有時我會好執著好繃緊，不過同鷹鷹、浩聰傾完計之後，人就會放鬆番，佢哋係永遠咁正面。」

「路跑界我最欣賞潔貞，我哋差不多同期出道，2千年係跑1500米認識，大家都跑左24年。我睇住佢成績慢慢上，2010年之後突飛猛進，跟住破左好多香港紀錄，好癲，可能同家豪有關。佢哋兩個都係好堅毅同超級正能量嘅人，雖然潔貞而家同我一樣半月板受傷，好似傷得重過我，但仍然好正面，佢話大不了咪換左佢囉，當係一件好小嘅事。雖然佢細過我，但我係佢身上學到好多嘢。」

「我經常去佢屋企食飯，見佢俾兩個女纏到成頭煙，十分疲累，但仍然可以有精力去工作、教班、又做好多公益活動，真女強人。」