----- 廣告 Ad -----
剛剛跑完京都馬拉松返嚟,但已經諗定出年再報名參加其他外國比賽,因為跑過後真係會上咗癮!
諗番起上年暑假時時,有個成日去海外跑馬拉松既朋友,摟我一齊報名玩京都馬。我都好耐未坐過飛機,更未試過係外國跑馬拉松, 所以我諗住完成咗隻渣馬至算。不過朋友話報咗名先,因為可能未必抽到,所以我當買六合彩既心態, 柴娃娃跟成班朋友去報名。
10月某日, 朋友同我講佢抽中咗京都馬,問我抽唔抽中…(我其實已經都唔記得件事), 我後來CHECK EMAIL至知道自己都抽中,心諗: 點解錦易抽中架! 死啦,抽中咗而點算! 驚驚地問番我朋友, 佢聽完笑到有腹肌,就話而家要快D去BOOK酒店先,因為好既會好快俾人BOOK唒, 買機票就要隨時留意廉航幾時做PROMO啦! 另外仲要PLAN吓到時既行程等等…忽然有錦多野要準備,聽完即時頭都大哂,我點解果陣時可以選擇唔去啫! 不過好彩冇話唔去,否則真係會後悔架!
----- 廣告 Ad -----
隨著完成渣馬後, 轉眼就要跑京都馬,之前都知道果邊既天氣好凍,得幾度左右,所以早已預備禦寒衣物, 包括手套、頭巾、暖包同雨褸等等。其實比賽前一日京都都仲落咗成日雨,好彩自己帶多對鞋, 否則要用風筒吹乾對鞋啦! (佢地既天文台好準,預測晚上10點就會停雨,比賽日陰天冇雨, 中唒!)
賽事報到處喺都展覽館/京都市勸業館舉行, 距離終點平安神宮好近,方便喺比賽日, 俾參賽者跑完後攞番行李及提供一個休息地方。一個巨大既紅色鳥居矗立喺神宮道上好有氣勢,以它作為終點標記好易認。
![絆走京都馬(初心者篇)_02](https://i0.wp.com/fitz.hk/wp-content/uploads/2016/03/絆走京都馬初心者篇_02.jpg?resize=720%2C405&ssl=1)
平安神宮既巨形鳥居
報到處設喺室內舉行, 的確唔怕受到天氣影响, 除咗參賽者, 其家人及朋友等任何人都可以參觀同場舉行既EXPO, 包括介紹京都馬拉松既歷史既主題展示區, 比賽路線既模型同實境況影片,東日本大地震照片展以及最受歡迎既運動用品販賣區,(包括非贊助商品牌),也有販賣比賽日穿梭巴士車票售票處, 同大會紀念品,活動舞台,以及設有款待小吃攤位區給參加者補充體力!節目非常豐富,如果有時間, 真係可以消磨成日架!
![絆走京都馬(初心者篇)_03](https://i0.wp.com/fitz.hk/wp-content/uploads/2016/03/絆走京都馬初心者篇_03.jpg?resize=562%2C428&ssl=1)
We are ready!!!
----- 廣告 Ad -----
參賽者喺報到處攞選手包時,大會已為海外跑手而設既服務台, 當中既工作人員仲識講國語及英文呢, 所以溝通冇難度! 大會亦提供攝影區俾參賽者影相服務。另有仲有好多免費記念品攞, 包括啤酒、繪馬、毛巾、脆米餅、手繩等等。
21/2/2016比賽日,天氣果然冇再落雨,甚至好到連太陽都一早走出嚟,雖然氣溫一直只得4-12度,間中被風吹時都覺得好寒, 但總比落雨時比賽更好吧,算係天公做美啦! 晨早未到6點,已經同朋友一齊坐的士到京都火車站,等坐接駁巴士去起點—西京極綜合運動公園。
![絆走京都馬(初心者篇)_04](https://i0.wp.com/fitz.hk/wp-content/uploads/2016/03/絆走京都馬初心者篇_04.jpg?resize=640%2C360&ssl=1)
後邊運動場係比賽起點
原來車程都至少45分鐘,差少少就到7點就到會場啦,我地嚟到運動場時好HIGH, 因為2個鐘後,大家就要喺到開跑啦!
![絆走京都馬(初心者篇)_05](https://i0.wp.com/fitz.hk/wp-content/uploads/2016/03/絆走京都馬初心者篇_05.jpg?resize=734%2C352&ssl=1)
運動場地圖
男更衣室設係運動場旁邊既京都市體育館,原來成個運動場都係開俾人換衫,好方便好體貼! (諗番起我地既渣馬,嚴格嚟講佢地根本就冇俾個專門地方你換衫,可能認為你唔駛換,或者應該喺屋企著定唒衫至好嚟…所以可憐既我地年年都只得當街除衫換衫, 諗起就嬲嬲啦!
京都市體育館–男子更衣地點 1
換好衫就出去物品寄存區放行李, 再同其他朋友會合。
![絆走京都馬(初心者篇)_06](https://i0.wp.com/fitz.hk/wp-content/uploads/2016/03/絆走京都馬初心者篇_06.jpg?resize=764%2C329&ssl=1)
隨身物品運送車
比賽由於只係分輪椅組同馬拉松組,所以唔會出現十幾個開跑時間,亦唔會出現後一組既快腳同前組既慢腳相遇(或相撞)既情況出現! 而每位參賽者既號碼布已跟據所報既成績而決定那個待機區域(起跑區域),企喺最前亦係跑得最快既編係A區,然後B區、C區…因為同朋友們既起跑區域各有不同, 所以最後決定偷雞一齊喺F區出發,好彩最後冇被趕出場咋,不過原來都好多人守規矩喺番自己既區域企,唔似得我地錦蠱惑!
----- 廣告 Ad -----
![絆走京都馬(初心者篇)_07](https://i0.wp.com/fitz.hk/wp-content/uploads/2016/03/絆走京都馬初心者篇_07.jpg?resize=629%2C337&ssl=1)
參賽者在等待起跑
當時間到在8:45AM,大會開幕儀式開始,包括由賽事會長及京都市要員宣讀演辭, 之後有1分鐘默哀,為東日本大地震罹難者哀悼並祈求能早日重建家園。因為運動場設有大銀等幕,所以參賽者可以清楚睇到主禮台既情況。
![絆走京都馬(初心者篇)_08](https://i0.wp.com/fitz.hk/wp-content/uploads/2016/03/絆走京都馬初心者篇_08.jpg?resize=755%2C358&ssl=1)
跑之前笑吓先
等開跑可能要等好耐,,所以大會既場刊已經提醒參賽者有關禦寒措施, 包括配戴BUFF, 可作為圍頸或頭巾等使用; 袖套、保暖褲、選用具有速乾性既長袖T SHIRT; 將透明膠袋開孔後使用, 或著上透明雨褸等等,大會為參賽者的確切想周到!
![絆走京都馬(初心者篇)_09](https://i0.wp.com/fitz.hk/wp-content/uploads/2016/03/絆走京都馬初心者篇_09.jpg?resize=803%2C389&ssl=1)
一齊加油
當時間到咗9AM,大會槍聲一嚮, A區既參賽者開始起步, 然後B區既接住跑, 跟住係C區…當就快輪到自己既F區起跑時, 我既心情已經HIGH爆!
![絆走京都馬(初心者篇)_10](https://i0.wp.com/fitz.hk/wp-content/uploads/2016/03/絆走京都馬初心者篇_10.jpg?resize=841%2C337&ssl=1)
準備起跑啦…
開始起步啦! 我跟著前邊既參賽者慢慢行,然後開始慢跑, 當最後踏上起跑線時, 代表我既外國初馬正式開始啦!
離開運動場後, 已發現街道兩旁已經企滿民眾,包括有媽媽帶著小孩,有老人家坐在櫈上,有主人拖住佢地既狗狗,有身穿校服或制服既後生仔女, 以至寺廟既僧侶等,加人大量既工作人員, 即使當時天氣好涷, 但仍願意走到街上,熱烈地為各參賽者打氣,這亦令我樂意走近佢地,大叫“奸爸爹“同佢地擊掌。 相比之下, 渣馬就係好孤獨去跑同冇咩人打氣啦…
![絆走京都馬(初心者篇)_12](https://i0.wp.com/fitz.hk/wp-content/uploads/2016/03/絆走京都馬初心者篇_12.jpg?resize=653%2C367&ssl=1)
HI FIVE
----- 廣告 Ad -----
![絆走京都馬(初心者篇)_13](https://i0.wp.com/fitz.hk/wp-content/uploads/2016/03/絆走京都馬初心者篇_13.jpg?resize=951%2C427&ssl=1)
好邪惡呀~佢地!
![絆走京都馬(初心者篇)_14](https://i0.wp.com/fitz.hk/wp-content/uploads/2016/03/絆走京都馬初心者篇_14.jpg?resize=678%2C327&ssl=1)
後邊就係好出名既渡月橋
另外大會補給站除了水,運動飲品及香蕉外, 仲有番茄仔、醋昆布、酣、紅豆包、檸檬蜂蜜包、鹽味糖、羊羹、生八橋(京都最有名的糕點) 、脆米餅及士多啤梨等等, 都仲未計民間提供既補給, 總之去到這裡比賽係冇可能餓嚫, 只怕食得太飽走唔郁咋…
![絆走京都馬(初心者篇)_15](https://i0.wp.com/fitz.hk/wp-content/uploads/2016/03/絆走京都馬初心者篇_15.jpg?resize=564%2C315&ssl=1)
天台既朋友你地好!
至於比賽路線會經過好多寺廟, 包括天龍寺、仁和寺、龍安寺、金閣寺、上賀茂神社、下鴨神社、銀閣寺這七大世界文化遺產,以及其他特式廟宇, 等諸多觀光名勝,在眺望嵐山、渡月橋風景的同時,沿著桂川跑,之後會經過嵯峨野、廣澤池、衣笠路,途經京都府立植物園內以及象徵京都的鴨川沿岸,同時欣賞京都御苑的茂盛綠意與歷史底蘊 ,還會行經京都音樂廳和京都市政府等著名的近代建築物。原來跑步加觀光的確可以同時進行既, 不過京都既景色實在太靚,幾乎忘記自己係喺度比賽緊!
![絆走京都馬(初心者篇)_17](https://i0.wp.com/fitz.hk/wp-content/uploads/2016/03/絆走京都馬初心者篇_17.jpg?resize=574%2C323&ssl=1)
仁和寺既僧侶都出嚟打氣
熱烈既賽事氣氛一直感染著我, 令我跑起嚟份外輕快, 但當大約跑到15K後, 忽然天陰加上冷風吹著, 大腿像被閃電擊中般扯著痛—痛得我直頭行都行唔到! 我惟有勉強行去路邊壓腿拉筋, 曾試嘗試問工作人員要止痛劑或冬青膏, 但唔識日文既我同佢地只有雞同鴨講。當眼見時間一分一秒在流走, 而我又覺得冇錦痛下就繼續跑…但,痛楚其實一直跟著我, 尢其當要上斜路時又再痛得被逼慢行! 心好急, 好擔心自己完成唔到賽事!
![絆走京都馬(初心者篇)_19](https://i0.wp.com/fitz.hk/wp-content/uploads/2016/03/絆走京都馬初心者篇_19.jpg?resize=803%2C450&ssl=1)
今宮神社
賽後自己諗番起,其實跑馬拉松絕對唔可以抱有輕挑既態度, 因為全長42.195K起路程,對我這類初哥絕對存在太多變數啦! 除咗睇自己賽前既里數儲得是否足夠外, 賽前既熱身,身體狀態及比賽配速,以至天氣因素都係非常重要。
好在有朋友一直係身邊傍住, 所以仍未至於獨軍作戰。而且後嚟遇到好多熱心人士幫忙噴止痛噴霧, 令我可以勉強繼續比賽。但止痛只係暫時, 藥效過後又再開始痛,我只能慢慢跑著或行著,如果冇CHECK POINT都應該可以一直行返終點,但就係因為有時間限制關門, 唔想俾人捉上巴士,所以被逼跑番快D,那種驚惶既心情只有慢腳既人士至可以感受到!
另外大會亦設有PACER,對於我嚟講,見到佢等同見到死神一樣! 當果幾個目標時間為“4小時30分“及“5小時00分“既PACERS分別跑過咗我時, 說明我已經要用多於5個鐘至可以完成比賽! 後來眼見“5小時30分“既PACERS亦已經出現時,嚇得我一定要死跟住佢! 好在去到最後2K既路段只係落斜, 所以跑得反而輕鬆D!
![絆走京都馬(初心者篇)_22](https://i0.wp.com/fitz.hk/wp-content/uploads/2016/03/絆走京都馬初心者篇_22.jpg?resize=583%2C378&ssl=1)
一齊衝線最開心!
當愈接近終點, 愈多民眾打氣。最後終於離遠睇見巨型紅色鳥居, 我用盡餘下既力氣,拖住疲累既身軀向前跑—當然我仲記得一定要舉高雙手, 帶著笑容向著前方望去衝線! 我向同行朋友互相擊掌後, 更回身向著剛衝線的地方躹弓—感謝舉辦這次比賽的大會及每位工作人員及市民既努力,令我深深感受到佢地既馬拉松精神!
![絆走京都馬(初心者篇)_23](https://i0.wp.com/fitz.hk/wp-content/uploads/2016/03/絆走京都馬初心者篇_23.jpg?resize=378%2C673&ssl=1)
千辛萬苦終於完成比賽啦!
兩個月內完成兩個馬拉松,原來我都可以做到! 日後有機會,我必會再次參加外國賽事!
![絆走京都馬(初心者篇)_24](https://i0.wp.com/fitz.hk/wp-content/uploads/2016/03/絆走京都馬初心者篇_24.jpg?resize=405%2C485&ssl=1)
邊塊靚D呢?
更多:
Fitz.hk Facebook專頁
人生之初馬點滴
[對於馬拉松,你想得到些什麼?] 記京都馬拉松2016
Fitz Running 跑步