絆走京都馬(初心者篇)_01

剛剛跑完京都馬拉松返嚟,但已經諗定出年再報名參加其他外國比賽,因為跑過後真係會上咗癮!

諗番起上年暑假時時,有個成日去海外跑馬拉松既朋友,摟我一齊報名玩京都馬。我都好耐未坐過飛機,更未試過係外國跑馬拉松, 所以我諗住完成咗隻渣馬至算。不過朋友話報咗名先,因為可能未必抽到,所以我當買六合彩既心態, 柴娃娃跟成班朋友去報名。

10月某日, 朋友同我講佢抽中咗京都馬,問我抽唔抽中…(我其實已經都唔記得件事), 我後來CHECK EMAIL至知道自己都抽中,心諗: 點解錦易抽中架! 死啦,抽中咗而點算! 驚驚地問番我朋友, 佢聽完笑到有腹肌,就話而家要快DBOOK酒店先,因為好既會好快俾人BOOK, 買機票就要隨時留意廉航幾時做PROMO! 另外仲要PLAN吓到時既行程等等忽然有錦多野要準備,聽完即時頭都大哂,我點解果陣時可以選擇唔去啫! 不過好彩冇話唔去,否則真係會後悔架!

隨著完成渣馬後, 轉眼就要跑京都馬,之前都知道果邊既天氣好凍,得幾度左右,所以早已預備禦寒衣物, 包括手套、頭巾、暖包同雨褸等等。其實比賽前一日京都都仲落咗成日雨,好彩自己帶多對鞋, 否則要用風筒吹乾對鞋啦! (佢地既天文台好準,預測晚上10點就會停雨,比賽日陰天冇雨, 中唒!)

賽事報到處喺都展覽館/京都市勸業館舉行, 距離終點平安神宮好近,方便喺比賽日, 俾參賽者跑完後攞番行李及提供一個休息地方。一個巨大既紅色鳥居矗立喺神宮道上好有氣勢,以它作為終點標記好易認。

絆走京都馬(初心者篇)_02
平安神宮既巨形鳥居

報到處設喺室內舉行, 的確唔怕受到天氣影响, 除咗參賽者, 其家人及朋友等任何人都可以參觀同場舉行既EXPO, 包括介紹京都馬拉松既歷史既主題展示區, 比賽路線既模型同實境況影片,東日本大地震照片展以及最受歡迎既運動用品販賣區,(包括非贊助商品牌),也有販賣比賽日穿梭巴士車票售票處, 同大會紀念品,活動舞台,以及設有款待小吃攤位區給參加者補充體力!節目非常豐富,如果有時間, 真係可以消磨成日架!

絆走京都馬(初心者篇)_03
We are ready!!!

參賽者喺報到處攞選手包時,大會已為海外跑手而設既服務台, 當中既工作人員仲識講國語及英文呢, 所以溝通冇難度! 大會亦提供攝影區俾參賽者影相服務。另有仲有好多免費記念品攞, 包括啤酒、繪馬、毛巾、脆米餅、手繩等等。

21/2/2016比賽日,天氣果然冇再落雨,甚至好到連太陽都一早走出嚟,雖然氣溫一直只得4-12度,間中被風吹時都覺得好寒, 但總比落雨時比賽更好吧,算係天公做美啦! 晨早未到6點,已經同朋友一齊坐的士到京都火車站,等坐接駁巴士去起點西京極綜合運動公園。

絆走京都馬(初心者篇)_04
後邊運動場係比賽起點

原來車程都至少45分鐘,差少少就到7點就到會場啦,我地嚟到運動場時好HIGH, 因為2個鐘後,大家就要喺到開跑啦!

絆走京都馬(初心者篇)_05
運動場地圖

男更衣室設係運動場旁邊既京都市體育館,原來成個運動場都係開俾人換衫,好方便好體貼! (諗番起我地既渣馬,嚴格嚟講佢地根本就冇俾個專門地方你換衫,可能認為你唔駛換,或者應該喺屋企著定唒衫至好嚟所以可憐既我地年年都只得當街除衫換衫, 諗起就嬲嬲啦!

京都市體育館男子更衣地點 1

換好衫就出去物品寄存區放行李, 再同其他朋友會合。

絆走京都馬(初心者篇)_06
隨身物品運送車

比賽由於只係分輪椅組同馬拉松組,所以唔會出現十幾個開跑時間,亦唔會出現後一組既快腳同前組既慢腳相遇(或相撞)既情況出現! 而每位參賽者既號碼布已跟據所報既成績而決定那個待機區域(起跑區域),企喺最前亦係跑得最快既編係A區,然後B區、C因為同朋友們既起跑區域各有不同, 所以最後決定偷雞一齊喺F區出發,好彩最後冇被趕出場咋,不過原來都好多人守規矩喺番自己既區域企,唔似得我地錦蠱惑!

絆走京都馬(初心者篇)_07
參賽者在等待起跑

當時間到在8:45AM,大會開幕儀式開始,包括由賽事會長及京都市要員宣讀演辭, 之後有1分鐘默哀,為東日本大地震罹難者哀悼並祈求能早日重建家園。因為運動場設有大銀等幕,所以參賽者可以清楚睇到主禮台既情況。

絆走京都馬(初心者篇)_08
跑之前笑吓先

等開跑可能要等好耐,,所以大會既場刊已經提醒參賽者有關禦寒措施, 包括配戴BUFF, 可作為圍頸或頭巾等使用; 袖套、保暖褲、選用具有速乾性既長袖T SHIRT; 將透明膠袋開孔後使用, 或著上透明雨褸等等,大會為參賽者的確切想周到!

絆走京都馬(初心者篇)_09
一齊加油

當時間到咗9AM,大會槍聲一嚮, A區既參賽者開始起步, 然後B區既接住跑, 跟住係C當就快輪到自己既F區起跑時, 我既心情已經HIGH!

絆走京都馬(初心者篇)_10
準備起跑啦…

開始起步啦! 我跟著前邊既參賽者慢慢行,然後開始慢跑, 當最後踏上起跑線時, 代表我既外國初馬正式開始啦!

絆走京都馬(初心者篇)_11

離開運動場後, 已發現街道兩旁已經企滿民眾,包括有媽媽帶著小孩,有老人家坐在櫈上,有主人拖住佢地既狗狗,有身穿校服或制服既後生仔女, 以至寺廟既僧侶等,加人大量既工作人員, 即使當時天氣好涷, 但仍願意走到街上,熱烈地為各參賽者打氣,這亦令我樂意走近佢地,大叫奸爸爹同佢地擊掌。 相比之下, 渣馬就係好孤獨去跑同冇咩人打氣啦… 

絆走京都馬(初心者篇)_12
HI FIVE
絆走京都馬(初心者篇)_13
好邪惡呀~佢地!
絆走京都馬(初心者篇)_14
後邊就係好出名既渡月橋

另外大會補給站除了水,運動飲品及香蕉外, 仲有番茄仔、醋昆布、酣、紅豆包、檸檬蜂蜜包、鹽味糖、羊羹、生八橋(京都最有名的糕點) 、脆米餅及士多啤梨等等, 都仲未計民間提供既補給, 總之去到這裡比賽係冇可能餓嚫, 只怕食得太飽走唔郁咋

絆走京都馬(初心者篇)_15
天台既朋友你地好!

 至於比賽路線會經過好多寺廟, 包括天龍寺、仁和寺、龍安寺、金閣寺、上賀茂神社、下鴨神社、銀閣寺這七大世界文化遺產,以及其他特式廟宇, 等諸多觀光名勝,在眺望嵐山、渡月橋風景的同時,沿著桂川跑,之後會經過嵯峨野、廣澤池、衣笠路,途經京都府立植物園內以及象徵京都的鴨川沿岸,同時欣賞京都御苑的茂盛綠意與歷史底蘊 ,還會行經京都音樂廳和京都市政府等著名的近代建築物。原來跑步加觀光的確可以同時進行既, 不過京都既景色實在太靚,幾乎忘記自己係喺度比賽緊!       

絆走京都馬(初心者篇)_16

絆走京都馬(初心者篇)_17
仁和寺既僧侶都出嚟打氣

絆走京都馬(初心者篇)_18

熱烈既賽事氣氛一直感染著我, 令我跑起嚟份外輕快, 但當大約跑到15K, 忽然天陰加上冷風吹著, 大腿像被閃電擊中般扯著痛痛得我直頭行都行唔到! 我惟有勉強行去路邊壓腿拉筋, 曾試嘗試問工作人員要止痛劑或冬青膏, 但唔識日文既我同佢地只有雞同鴨講。當眼見時間一分一秒在流走, 而我又覺得冇錦痛下就繼續跑但,痛楚其實一直跟著我, 尢其當要上斜路時又再痛得被逼慢行! 心好急, 好擔心自己完成唔到賽事!

絆走京都馬(初心者篇)_19
今宮神社

賽後自己諗番起,其實跑馬拉松絕對唔可以抱有輕挑既態度, 因為全長42.195K起路程,對我這類初哥絕對存在太多變數啦! 除咗睇自己賽前既里數儲得是否足夠外, 賽前既熱身,身體狀態及比賽配速,以至天氣因素都係非常重要。

絆走京都馬(初心者篇)_20

好在有朋友一直係身邊傍住, 所以仍未至於獨軍作戰。而且後嚟遇到好多熱心人士幫忙噴止痛噴霧, 令我可以勉強繼續比賽。但止痛只係暫時, 藥效過後又再開始痛,我只能慢慢跑著或行著,如果冇CHECK POINT都應該可以一直行返終點,但就係因為有時間限制關門, 唔想俾人捉上巴士,所以被逼跑番快D,那種驚惶既心情只有慢腳既人士至可以感受到!

絆走京都馬(初心者篇)_21

另外大會亦設有PACER,對於我嚟講,見到佢等同見到死神一樣! 當果幾個目標時間為4小時305小時00PACERS分別跑過咗我時, 說明我已經要用多於5個鐘至可以完成比賽! 後來眼見5小時30PACERS亦已經出現時,嚇得我一定要死跟住佢! 好在去到最後2K既路段只係落斜, 所以跑得反而輕鬆D!

絆走京都馬(初心者篇)_22
一齊衝線最開心!

當愈接近終點, 愈多民眾打氣。最後終於離遠睇見巨型紅色鳥居, 我用盡餘下既力氣,拖住疲累既身軀向前跑當然我仲記得一定要舉高雙手, 帶著笑容向著前方望去衝線! 我向同行朋友互相擊掌後, 更回身向著剛衝線的地方躹弓感謝舉辦這次比賽的大會及每位工作人員及市民既努力,令我深深感受到佢地既馬拉松精神!  

絆走京都馬(初心者篇)_23
千辛萬苦終於完成比賽啦!

兩個月內完成兩個馬拉松,原來我都可以做到! 日後有機會,我必會再次參加外國賽事!

絆走京都馬(初心者篇)_24
邊塊靚D呢?

 更多:
Fitz.hk Facebook專頁
人生之初馬點滴
[對於馬拉松,你想得到些什麼?] 記京都馬拉松2016
Fitz Running 跑步


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 跑步 Running > “絆”走京都馬 (初心者篇)