----- 廣告 Ad -----
老人院時間:講到「魔鬼教練」你會諗到邊位人物?我呢啲年紀,梗係第一時間諗起電視劇《新紥師兄》嘅葉SIR (吳孟達飾)。後生些少嘅朋友,或者又會話《男兒當入樽》嘅安西教練先至係魔鬼。
直到認識了馬高教練,才知道所謂「魔鬼教練」,絕不需要惡形惡相。笑口吟吟。好聲好氣,亦足以「殺」死你!
而馬高教練嘅「魔鬼行徑」,就係導你加入索K行列,令你不能自拔地愛上跑步。
![[馬高教練專訪] 同你講心的魔鬼 2](https://i0.wp.com/fitz.hk/wp-content/uploads/2016/08/馬高教練專訪-同你講心的魔鬼-2.jpg?resize=467%2C700&ssl=1)
笑口吟吟嘅馬高教練
----- 廣告 Ad -----
- 原名:李宏俊 (Marco)
- 綽號:男神教練、馬高教練、男神 (總稱:男神馬高教練)
- 職員:消防員
- 年齡:自己問佢
- 愛好:長跑
運動員成績 (部份):
- 揹水一戰2015 (隊際冠軍)
- New Balance 首屆半馬拉松賽 (3rd runner up )
- 渣打香港馬拉松2015 時間2’41’13 (總名次第6 )
- New Balance 10K 2015 ( 3rd runner up )
- 第四屆美津濃城門河10公里賽 (1st runner up )
- Gigasports 10km ( 2nd runner up )
- 健康快車 建行(亞洲)慈善跑步行 2015 (overall 1st runner )
- 渣打香港馬拉松2016 時間2’41’10 (總名次第7 )
- Sogo charity run 2016 10km (冠軍)
- 揹水一戰2016 (30km 隊際冠軍)
- Tolo 港10km (2nd runner up , 隊際冠軍)
最難忘的比賽
筆者身為一位過氣報紙記者,見到上面呢份檔案,最簡單嘅整理方法就係搵出重點,於是我第一時間就問:「馬高教練,你最難忘係邊一場比賽?」
原本以為係隨問隨答,點知教練諗咗好耐,佢只係答:
----- 廣告 Ad -----
「其實場場比賽都好難忘架喎,因為自己盡咗力!」
坦白講,我當時有少少跌櫈,覺得完全係啲行貨答案!誰不知,教練呢個答案絕不行貨,佢紥晒馬,慢慢再解釋:
「對一個跑手嚟講,每一場比賽都應該好緊要,亦要盡力去跑!懶惰係運動員最大阻礙。」所以馬高教練強調,跑步嘅心態,比起身體嘅訓練,往往更加重要。
馬高教練舉出2016年渣馬做例子,佢話作為教練,往往要教大家調節心態:
「咁大家都記得,2016年渣馬開跑前,人人都話要雨中作賽,又話驚會濕身,又話驚跑得差。我就話,擔心呢啲為乜?既然比賽嘅環境大家改變唔到,咁大家又練咗咁多個月,就梗係以享受比賽嘅心態去準備啦!」
馬高教練就係咁,鼓勵大家點樣去享受跑步嘅樂趣。
![2016年渣馬,每位參加嘅跑手都感受雨中濕透嘅感覺。](https://i0.wp.com/fitz.hk/wp-content/uploads/2016/08/馬高教練專訪-同你講心的魔鬼-9.jpeg?resize=760%2C507&ssl=1)
2016年渣馬,每位參加嘅跑手都感受雨中濕透嘅感覺。
享受跑步樂趣
兩個月前,筆者訪問了我嘅偶像,體育評述丹尼爾。我見佢間中可以跑到5分幾鐘Pacing,就以為佢好鍾意跑步,點知佢話:
「其實我真係唔鍾意跑步架,因為跑步只係做一啲重覆動作,我覺得好悶!」
![呢兩年,丹尼爾都會定期做運動。睇佢步速,都絕對唔係hea跑。](https://i0.wp.com/fitz.hk/wp-content/uploads/2016/07/丹尼爾-VS-陳恩能-愛做有意義的事-2.jpg?resize=720%2C720&ssl=1)
呢兩年,丹尼爾都會定期做運動。睇佢步速,都絕對唔係hea跑。
----- 廣告 Ad -----
我就住呢個講法問馬高教練,佢話:
「你咁講,其實跑步都可以好悶架。不過,正如我話跑步最重要係心態,其實只要用心去享受跑步嘅過程,咁跑步一啲都唔悶!」
馬高話,佢自己就好享受跑步嘅獨處時光,佢話好難得可以喺完全無人打擾之下,做自己鍾意嘅嘢,而跑步嘅時候,又往往可以諗通好多問題。
馬高仲補充,其實我哋唔使咩都去計較結果,享受過程,往往比起結果重要,對你自己嘅得著更多!
![睇教練上堂係完全feel佢同學員係打成一片。](https://i0.wp.com/fitz.hk/wp-content/uploads/2016/08/馬高教練專訪-同你講心的魔鬼-4.jpg?resize=760%2C507&ssl=1)
睇教練上堂係完全feel佢同學員係打成一片。
忠實的步兵
筆者2014年再次正式參加長跑比賽,第一次跑渣馬半馬,達到2小時10分左右嘅成績,一步都無行過,滿心喜歡。但慢慢地,唔知係因為自己懶,還是因為自己熟悉比賽環境,開始喺比賽時會做步兵。由參加山賽上樓梯慢慢行開始,連路跑都鍾意行。行過創興水上活動中心嘅的大斜路,之後更差唔多行晒整段三號幹線。結果,我自認係一位忠實嘅步兵。
於是我問馬高教練,我出咗啲咩問題?有咩訓練可以令我脫離「步兵」身份?
教練不慌不忙,說出了重點:「心理質素」。
![Fitathlon 最後一場操練,學員喺烈陽下練core,真係少啲堅持都唔得。](https://i0.wp.com/fitz.hk/wp-content/uploads/2016/08/馬高教練專訪-同你講心的魔鬼-3.jpg?resize=760%2C507&ssl=1)
Fitathlon 最後一場操練,學員喺烈陽下練core,同時練埋大家嘅心理質素。
馬高教練覺得,運動比賽,心理往往較身體重要。而建立良好嘅心理狀態,就可以藉住兩個方向:
- 定下目標:例如一個明確嘅完賽時間,或者具體要求 (如半馬全程唔行),再制訂訓練計劃。
- 課堂上嘅堅持:每一次操練,每一個細節,都要好好完成。馬高話:「呢一次放棄,就會製造下一次放棄嘅機會。」
久而久之,放棄就成為你嘅常態。呢次見到斜路就行,下次就會索性上岸!
----- 廣告 Ad -----
訪問到呢一刻,我腦海浮現「魔鬼教練」四個字。「魔鬼」在於,我知道我之後要成日問獄長拎行街紙,甚至要攞簽證,令自己快啲脫離步兵嘅生涯!
而對於呢位「魔鬼」,我由衷拜服!
(待續)
按:下一篇會講講馬高教練嘅教練生涯,以及佢鍾意嘅學生。
更多:
Fitz.hk Facebook專頁
[郁民教室] 新手10K訓練計劃
我的十大外國名人跑步女神
[郁民教室] 運動場踏出「第一步」
Fitz Running 跑步