自從跑完今年渣馬全馬後,患咗感冒成兩個星期，而且好耐都未試過成兩個星期冇跑過, 難得有餘暇，睇番以前既相, 發現原來自己曾經參與9屆既渣馬賽事!
回想自己喺08,09年係報10k, 比賽前我都冇特別去練，最多只喺比賽1個月前至開始去運動場跑!
自製之手帶, 但防唔到水
當09年跑完10k過終点時,竟然跑完“唔夠喉“, 所以第二年起開始我既半馬生涯。不過當時既我，只係抱著志在參與既心態去完成比賽，每年比賽報名後至會開始練跑, 直至比賽完就休腳! 我冇參加任何團跑或跑會,身邊既朋友亦唔多鍾意跑步，所以每次比賽完後，我只會好快就離開會場,同而家既我相比，真係好LONELY!但,奇怪每年我一定繼續報名參加!
到15年果屆,身邊好多朋友知道我一直有玩開渣馬既, 都建議我轉玩全馬。當然玩咗錦多年半馬，其實亦曾經有少少想玩全馬既想法，但畢竟係兩個唔同級別既賽事，自問未有足夠能力去完成42.195k既賽程, 所以當時我决定繼續玩我既第6年半馬,但我亦已經為我既備戰全馬行動宣佈—正式啟動!
的而且確，當15年的渣馬完咗後,為咗令自己跑多D, 我每個星期總有兩次戶外跑(全城街馬,係佢令我愛上街跑!),我亦開始報玩渣馬以外既比賽 (包括路賽及山賽),参與大小既團跑活動，甚至加入跑會,希望自己跑得更好，曾經有某幾個星期竟一連5日都冇返屋企食飯，真係見跑友仲多過見屋企人!
----- 廣告 Ad -----
開跑前已經開始落雨
講返今屆既賽事，比賽日天氣係近10年以嚟最惡劣既一屆!雨水一直都好似未曾停過…呀，講錯咗! 有停過，不過已經係差唔多跑完時至唔落啦! 本來賽前對我這位初馬參加者已經擔心好多野，諗吓自己跑唔跑得完，會唔會中途抽筋或撞牆, 會唔會俾人捉去坐巴士，會唔會冇哂朱古力攞或宿攞咗D生蕉等等…而家又多咗天雨一個大問題去考驗我。不過，畢竟自己比以往付出多咗時間同精神，有師兄同我講過: 平時練咗幾多，比賽時就會俾到幾多，冇人可以只靠打天才波就成功，一定要先有付出才有收成。 身邊既團跑隊友亦不停勉勵我，俾咗好大既信心令我去努力應戰，所以我決定如果中途抽筋而跑唔到，我會行; 我唔會俾人捉上巴士坐; 冇香蕉朱古力，我自己有GEL食，落大雨我就著雨褸跑…總之見招拆招!
我既跑團—將軍夜遊
比賽當日, 開跑前已經開始落雨，唔著雨褸會淋濕身，但著住跑又好焗，我諗跑完自己應該淋襯或焗襯啦，好無奈但比賽都係要繼續進行。當跑到賽道大約19k時,左边小腿開始有點抽,甚至愈跑愈痛，最後惟有慢慢行順再繼續跑。
難得停雨, 係汀九橋影相留念
----- 廣告 Ad -----
雨好似一直未落, 尢其係橋上跑風勢又大，令我跑得好狼狽。身上的雨䄛係我當時最可靠既拍檔之一，雖然曾經停過雨,但我都一直帶著件雨褸, 因為唔知幾時又再落雨嘛!
雨中都要擺POST—苦中作樂
當過完西隧到上環天橋時,體力已經用得七七八八, 開始對腳又累又扯住痛，只能放慢腳步時行時跑，以及靠意志支撐，辛苦既時刻時間過得特別慢，我深深感受得到。
轉出銅鑼灣一刻
跑著跑著，忽然聽到身邊好嘈，原來已經到咗銅鑼灣最後路段啦! 當聽到不斷有人打氣或歡呼，令我好似注入大量動力再可以加快地跑，直到衝缐一刻,眼角竟不自控地泛起淚水…原來, 主要因為跑完對腳痛到想喊咋!
衝線的一刻
跑出既時間已經唔重要，最重要係體驗比賽過程及完成到賽事。
人生就好似要不斷進行馬拉松,每次需要跑很長遠既路程去完成, 而且途中可能遇到好多困難(天氣、身體狀況),從中鍛練意志和努力,其實更要有計劃去完成比賽,這就是我從馬拉松領晤既人生觀。
跑完去同隊友食番餐勁既
更多：
Fitz.hk Facebook專頁
[渣馬筆記] 新手的6個見聞
[初馬成了] 能持續 獲得糟蹋亦滿足
Fitz Running 跑步
----- 廣告 Ad -----
