前回提要: 三個字 – 痴筋中
我最後決定慢跑餘下果10K。。。但呢個簡直係我人生入邊最長嘅10K! ! 我冒住斷筋嘅危險，決定死撐落去。
腳嘅肌肉呀，筋呀，來個超級投訴大匯演。淨返果10K抽筋情況不斷出現。跑一陣就抽，拉下，再跑，再抽，無限輪迴。最頂癮係我跑到入西隧中間要焗住停底拉筋時，隔離突然駛左架巴士埋黎，心諗 :『乜料呀?』。司機大佬望一望我，做咩啫，我得罪左你咩，想我點啊? 雖然佢冇出聲，但感覺佢好似招魂咁 : 『師兄，有車，你真係唔上? 』我再枱頭望上車入邊，車上D人嘅眼神好一致咁望住我，搞到我紅都面晒。好彩果時我戴左帽，唔係比人認到自己都幾樣衰。
最後去到馬師道諗住用6年黎練返嘅 <虛榮力> 去鎮壓住D劇痛，魯賓遜(怒奔順) 咁返終點。好可惜我再一次天真了， 可能我個人唔夠虛榮，狂賣老抽時根本乜力都用唔到，腳趾尾係抽得最勁，稍為用錯少少力，粒指頭都即抽冇情講。
轉到入軒尼詩道見到有位師兄，拎住支類似愛膚堅既物體噴腳，笑口騎騎咁，緊係唔理三七廿一唔知係乜，叫佢噴我對腳兩野先啦。好感激師兄嘅協助，唔單止高登有愛，原來連軒尼詩道都有愛架!! 至少可以比我頂住一陣。大家幻想一下，我係馬師道天橋到維園終點得1K 到，呢度行下停下用左我至少20分鐘。有對觀戰情侶，真係好支持我，見我停底抽筋痛苦個樣，請左我食蕉。。。呢個真係好好既鼓勵呀!!
到最後入維園終點前50米，我兩隻腳終於出個大絕，同時抽到我郁唔到，直情企左喺度。以往未試過咁大支野企在路中心，拎住隻蕉都幾似自由神像。果下真頂唔順舉手召唤女工作人員，佢見我咁辛苦想扶我出場，唔係掛?? 我內在聲音同我講:『喂哥仔，抽到筋都斷裂咁捱左10K返黎，仲有少少就過終點，你唔係唔頂埋佢呀?』。我示意佢幫手扶我去邊位就可以，因為我痛到連叫嘅聲都冇。我休息左廿零秒就拎住隻蕉跑過終點 (最後隻蕉好似熟到爛左)。
過左終點，當妹妹仔笠個完賽牌比我果時，真係喊出黎。 好難想像自己用意志力，由32K抽到返終點。我嘅眼淚係有一半係送比我筋，一半係比我捱到見到個完成牌。不過經過今次，証明左我死撐力同硬食能力都幾高，D筋係值得抽的。最終完成時間係5小時30分，嗚呀~ 仲慢過唔練。
跑完去拎行李、拉下D痴左嘅孖筋、坐底休息半個鐘，再起身行返嘅時候會立即變左石膏人。由維園去天后地鐵站都想斬左對腳，特別落樓梯簡直痛不欲生。但有趣既係，同時間見到有幾個石膏人同我一樣，落樓梯好似機械人咁，個感覺都幾溫馨，心諗唔知呢幾位需要用幾多時間爬返屋企呢? XD
經過今次，總結左以下慘死原因:
----- 廣告 Ad -----
- 長課最盡只跑到38K，諗住4K點捱都跑到。但當你肌力唔夠跑42K，其實要你跑多500米 都難。
- 冇控制pacing，比人同比賽氣氛影響自己。
- 心口流血係自己太大意，冇貼乳貼同搽花士令，因為咁多年都冇事。而且已經比好多跑友用 <血滴子> 稱呼我。。。
不過歸根究底，重點都係源於心理質素問題。如果心理質素好，基本按住自己所訂下嘅進程唔受外在環境影響，失敗既機會可以減到最低。做任何事情都一樣，往往心態就係決定境界。 反省過後，就我個人而言，一定要比自己跑長過42.195 K 才以有足夠耐力應付全馬。所以經過一次團跑+食豆花，我初次跑了一次超馬課 – 42.5K，就係多左0.31K！縱使你比之前多跑1米都好，都已經突破同超越左自己嘅極限。之後就慢慢跑上51K > 60K >72K >116K>??K，下個一距離我唔知係幾多，但我相信一定可以再突破自己極限。
而從中我亦都醒悟到關家良一本書名 <放下速度的勇氣> 的自我理解。(利申: 本書我未睇晒。。。)
更多：
Fitz.hk Facebook專頁
[鋼鐵之意志] 渣馬令我決心有「砍掉重練」的勇氣—激鬥前篇
[鋼鐵之意志] 渣馬令我決心有「砍掉重練」的勇氣—醒悟後篇
沙灘@Fitz.hk
Fitz Running 跑步
