陰晴風雨同路行系列

我係一名抑鬱症患者。我的長跑故事由2001年患病開始，至2013年正式接觸長跑，2017年11月完成個人首個毅行者100公里。

呢個系列，唔會有全馬sub-2訓練方法，都唔會有山賽攻略，筆者也沒有蝦叔，陳伯行雲流水的文筆，它只是如實記錄了一個抑鬱症慢腳，透過跑步得救的故事。如果浪費了你的時間閱讀，只能說聲抱歉；如果有同路人看了拙作後能踏出第一步改變，自是功德無量。

Episode 0 – 由零之前，一念無明

(來源：電影劇照)

已經唔記得2001年確實發生過咩事，總之在不同的壓力下，到果年11月開始爆煲：集中唔到精神、害怕返工、冇晒動力、唔想見人，成日失眠到天光，但又可以超過24小時唔落床唔食嘢剩係瞓。咁好似好普通啫，好多香港人都係咁㗎啦! 係呀，所以最初去公立醫院精神科，醫生同我傾咗成個鐘的結論都係覺得我乜事都冇，最好藥都唔好嚟攞，咁大個人有壓力咪自己解決囉!

咁呀，咪繼續返下工又請下假，02年夏天仲結埋婚添，幾美滿呀! 鬱乜鬼呀你? 拖拖下一年，到11月終於再爆。身邊成日有朋友問返我有情緒病係咩感覺，我只係記得果陣老婆要輪班，有時好夜先返，一個人在家，走入廚房，望住窗口，切唔切碎 (山界用語，意思自己意會) 其實只係一念之間。

或者錯過咗治療最佳時間啦，總之睇過好多醫生，轉過好多藥，東區醫院精神科病床都瞓過，都有穩定過幾年嘅，但更多時只係反反覆覆，每次發生一啲事影響情緒甚至無端翻發，只會再一次提醒自己幾冇用。印象最深一次係好朋友結婚，好想出席但去到酒樓門口只懂狂哭唔敢入去見人。我曾經以為我這一輩子就要這樣失敗地過。

抑鬱症奪走了我的健康，我的事業，幸好家人不離不棄。到了2013年夏天，當我又一次失業時，無無聊聊唔知痴咗邊條線走落街跑步。烈陽下跑咗一兩k卦? 想死但之後好似幾開心喎! 成個8月斷斷續續咁有跑下。9月入戲院睇咗 ”激戰”，深受感動，尤其喜歡歌曲下賤輝一個人為自己苦苦操練。我唔想到我熄燈果陣連一件值得記得嘅事都冇，我希望完成一次馬拉松 — 我當時認為係天方夜譚的事。

來源：電影劇照

(待續…)