[UTMB 朝聖之旅] 離場退賽 重要的一課

終於，一嘗了退場嘅滋味。初次踏足 100miles 賽事，朝聖之旅 UTMB。最後，我要選擇離場退賽。

由知道抽中 UTMB 開始， 一直戰戰兢兢， 未到最後一刻唔肯定自己係咪確認出賽

下定決心後， 連番練習， 經常練到通宵達旦

----- 廣告 Ad -----

知道天氣冰涼， 係我可以發揮得最好嘅氣候， 頓時為我打左一支強心針

冰涼嘅天氣可謂「開正我嗰瓣」、賽前亦有充分嘅休息， 傷患有明顯好轉，還有阿媽預備嘅住家飯， 萬事俱備。確是起步開得好順，一直有氣有力，50km 前嘅 CP 均比我預期早左到達，時間鬆動之餘仲令我可以主動去揾返 D 研究員做埋個測試。不過長途賽可以發生好多事，前段狀態幾好也好，未到最後一刻都唔代表什麼。尤其今次第一次玩 100miles，我一直都有留力， 加上 20km 右腳膝頭外側開始有份撬下撬下嘅感覺，呢份感覺，似曾相識，響北極馬拉松都曾經出現過，所以逢係落山我都放慢只係順勢落。只是去到 40km 左右撬下撬下開始變成赤痺，去到 50km 後更是變成疼痛，60km 左右由山頂落山，痛楚更一發不可收拾，右腳稍為微曲就劇痛。

雖然未係最佳狀態， 但仍然會全力以赴

難得父母長途跋涉都嚟捧場， 加強左我完賽嘅決心

準備就緒， 出發!

天氣冰涼， 我發揮得好好， 上山鮮有地有氣有力

----- 廣告 Ad -----

好不容易落到 65km 嘅 Cp Lac Combal，時間開始變得緊絀也好，我都停了差唔多三十分鐘及按摩痛楚位置。我咬緊牙根嘗試繼續，點都捱到 Courmayeur 再看看情況如何。但是落山，真係舉步為艱，我知有機會 cut off 前都到落唔到 CP，就算落倒，往後仍有 86km，仲要係大起大落，隻腳捱唔捱倒? 我不禁問自己 : 我是否需要退場?

UTMB沿途景緻十分壯觀

行到呢度， 腳痛情況加劇。 但見倒如此漂亮嘅日出， 我仍決定咬緊牙關走下去

身邊不停有朋友越過我，佢地都加以慰問同鼓勵。落到 Courmayeur，剛剛好一分鐘前 cut off，我諗都唔諗標出場館。既然趕得切，就繼續看看。Courmayeur 後嘅 cut off 開始放緩，我企圖探試一下能否慢慢走下去。其實除左落山，上山或平路一直無問題，上 60km 那座 2500m 高嘅 Col de la Seigne 正在横風横雪，我可以比平時更快嘅 pacing上山，仲不停越過唔少外國跑手。

由 Courmayeur 到 Refuge Bonatt i主要為上山及平路，我仍可以追趕，更試圖偷多一點時間愛嚟落山用。只是由 Refuge Bonatti 到 Amouvaz 主要係落山嘅路，短短 5km，我足足用左一個小時四十五分鐘。到 Amouvaz 時比 cut off 早三分鐘到達，工作人員問我 : go on? Or stop here?

要響3分鐘時間做決定，殊不容易。往後嘅天氣氣温更低，山上只係負 10 度，都唔係問題。只是要在力氣充沛下要選擇剪帶，確是殘忍。然而上到 Grand Col Ferret，打後有 10km 嘅落山，我好清楚隻右腳會負荷不了。由 50km 開始痛， 我頂多左 45km，我盡左力。我知沒有逞強嘅餘地， 也不能愚昧一味死充。 往後陸續有好多 team 嘅賽事，我亦需要對我嘅隊友負責任。我沒有「未試過DNF」 嘅心理包袱，最後用左30秒時間做左個決定，好清晰咁同工作人員講： I stop here。

最後決定退場， 我感到無悔。 我知道， 我一定會再來。

望住工作人員剪左塊 BIB 上面嘅 bar code，我沒有苦澀嘅感覺，反而覺得上左一堂重要嘅一課。唯一嘅遺憾，就係父母第一次山長水遠地走嚟睇我比賽，卻無法見倒我衝線嘅畫面。好記得一出發我轉頭同亞媽講 : 終點見啦！我亞媽仲笑得好開心不停話好。不過從當時佢雀躍嘅心情，我知佢多左一份明白，因乜解究亞女成日飛嚟飛去，仲要逢係星期六日成日唔見人，返親屋企就損手爛腳兼爛身爛世， 然後仲要洗到成個浴室都係泥。

佢地一向都唔理解我做乜要成日咁頻撲同攪到自己咁辛苦，今日返到民宿，佢地知我肌寒交迫特登煮定飯等埋我返嚟食，佢地不停問左我好多有關比賽嘅野，阿媽仲話 “估唔倒係咁熱鬧”，我知佢地多左一份認同。我話下次揾個同樣咁熱鬧嘅比賽再帶佢地去，會近D響日本等佢地唔駛舟車勞動咁辛苦。

不過大前提要等我練好 d先，因為，我要佢地下次一定可以睇倒我衝線。

簡單D講，即係繼續要成日週圍飛，禮拜六日繼續成日唔見人……

雖然腳痛令我時間慢左好多， 但我仍不忘享受比賽， 樂在其中