[找數真漢子] 抽水抽著火水 抽籤抽中東馬

有時啲嘢，真係整定。

如果你未聽聞呢度有人要找數，條數又係找乜嘅話，首先建議睇返呢篇文章。簡單重溫: 有人早前同女友打賭，話對方抽中又完成到毅行者100公里嘅話，自己就會去跑個馬拉松 (注: 女方本身已完走N隻馬，而男嘅，亦即係本人，2012年行過毅行但從來唔跑步，係名乎其實跑2K都想死嘅死肥仔……

其實當下應承，都唔係無計過嘅，心諗：你抽到又行到先算啦! 大家都知，毅行者近年越嚟越難抽，自己抽咗兩年後備名單都無，點知佢舊年(2016)又會咁順利架啫……不過算! 你抽到時我都要抽，以我呢個無成績支持、無跟跑會、無乜比賽嘅「N無人士」，都係抽中先算啦，點不知，運氣嘅嘢，真係話嚟就嚟……

數，既然要找，咁籤，就無得唔抽，呢個跑季，我總共入籤三隻馬，聽天由命，抽中邊隻就跑邊隻，最好就有咁難中得咁難中，咁抽唔中都唔關我事吖! 結果，第一隻公布嘅香港渣馬，中! (個心涼咗一截，仲頂得住)；第二隻，東馬，中! (唔係下化，唔係東莞馬拉松喎，東京8%咁都中!?) 最後去到第三隻京都馬，中埋! (已經唔識反應) 唔……我知我要找數，但都唔使咁樣下話，六合彩又唔見我中……

不過喺呢個moment，容許我道個歉。

如果唔係抽中東馬，我都幾肯定會去京都，但而家兩個比賽只差一個星期，連完成一隻都有極大疑問嘅我，真係零信心連馬，唯有選擇放棄……仲有個人需要一提，沙灘哥曾經同我講：「照報全馬啦，報咗你先會練!」係，你啱! 成個夏天都偷懶嘅我，而家知錯了。

2018.1.21 渣打香港馬拉松
2018 2.25 東京馬拉松
2018 3.25 buff 逆走100 (仲私人送多個找數山賽……)

有晒時間表路線圖，今次真係唔練唔得，壓力來源已經超越咗找數，而係去到東京，跑唔完點對得住鄉親父老!? 要知道，東馬時限7小時，男子組別完走率年年都九成幾 (2016年係96.7%)，「你知唔知有幾多人想跑都無得跑呀!? 」連抽4年都唔中的債主如是說，我知，我都唔係想咁架…….

之不過咁，自從認真加操，好自然對跑步認識多咗。村上春樹話：「痛是難免，苦卻是甘願」，老老實實，練跑真係好L辛苦，不過亦體會咗好多，留返下篇再分享吧。

最後，而家距離渣馬仲有三個月，大家會有咩意見俾小弟? 利申: 10K PB 1小時17分，未試過完成半馬，目標係「唔好死」。

更多：
Fitz Facebook專頁
[找數真漢子] 零操練PB完走10K馬拉松
[找數真漢子] 馬拉松之旅 由街馬DQ開始
Fitz Running 跑步