陰晴風雨同路行系列 EP.1 第一次，第一年

續上篇《陰晴風雨同路行系列》

Episode 1 第一次，第一年

有了跑一次馬拉松這個念頭，我開始留意有關跑步的資訊。當時認識的人中只有我三哥有恆常跑步的習慣，參加過幾屆渣馬的十公里賽事。他建議我應由十公里比賽開始，但係9月渣馬都過咗報名時間 (果陣仲係鬥快按F5先到先得方式報名)。我懶在網上找更多資料，只係有一次睇財經雜誌，見到11月有個慈善比賽，有7公里組別，乜都冇睇清楚就報咗名。

菜鳥開始練跑嘅頭3個月係最開心，你肯一星期抽兩三日落街跑下，好快會有進步。當時我的新工作是在下午開始上班，只要上午能戰勝心魔落床，有好多時間練習。見到自己每次訓練時間同距離都能延長，良性循環下會推動自己下次要挑戰更長的距離和更快的速度。10月未完結，我已經可以用1小時16分鐘 (即係A神傳說中嘅真•八分披) 完成10公里，每次練習後都會懷着愉快的心情上班去。

到咗11月9日，迎接我的第一個比賽。吓? 夜賽? 香港仔郊野公園? 山賽嚟㗎? 新手常犯錯誤之一：冇睇清楚比賽資料就報名。但係俾咗錢又練咗兩個月，死就死啦! 攞住支電筒就出發，黑麻麻都唔知條路係點，係記得好多斜路，又要上落樓梯，前面個師兄冇帶頭燈電筒又好似跑得好快，懶好心驚佢出事咪勾佢車尾。返到終點好興奮，仲大叫咗幾聲先衝線 (明明都接近包尾)。原來完成一個比賽有咁大滿足感，我應該毒已中喇!

Quote from A神：呢場人生馬拉松都一樣係唔知叫唔叫山賽，都一樣係辦一屆就冇咗，所以要好好珍惜

----- 廣告 Ad -----

可惡的一剔，當年個Running App大更新時連所有舊嘅跑步記錄都刪除晒，只留下自己的cap圖可翻看

“Where there’s a will, there’s a way”，當我心思思想再搵比賽報名時，三哥搵我，話佢認識香港防癌會的朋友，有慈善名額參加2014年的渣馬十公里。跟住兩個月除咗努力搵贊助 (三千大元，比現在官方的慈善位籌款金額還多，最後自己都俾咗六百先夠數，不過做善事，值得)，當然繼續俾心機練習。要令自己有新鮮感，成日睇地圖睇下可以跑去邊。我家住藍田，試過經澳景路跑入清水灣，同埋經科大跑入西貢碼頭 (兩條線都係約15公里)，原來搭11號咁方便。同年12月尾，第一次可以1小時內完成10km。到2014年2月，我第一個十公里比賽時間是56分。我天真以為第二年便可以挑戰全馬……

(待續…)

同路人小分享：運動有助分泌安多酚，以跑步作為訓練最大的優點是不需要有伴，你也早應該習慣孤獨。慢慢，你會發現 You’ll never walk alone!