[麥鳳港衛] 香港四大山徑 10大勝景

圖片來源

有山友傳嚟一個行山 group 嘅帖子，問我香港四大山徑究竟邊一段最靚。大家一言一語，決意選出「香港四大山徑 10大勝景」。

>> 原帖載於 香港行山遠足之友(吹水山谷)

圖片截自香港行山遠足之友(吹水山谷）

----- 廣告 Ad -----

講明先，選出嘅「勝景」絕對係各花入各眼，而且我哋眼光有限，歡迎各位留言補充。

(香港四徑分別係麥理浩徑、衛奕信徑、港島徑及鳳凰徑，香港好多秘景靚景都唔喺呢幾條山徑入面。所以大家唔好問點解無梧桐瀑布，或者鬼手岩。)

麥徑二段 (三大靚海灘)

大浪西灣 圖: Wing Leung’s Outdoor Blog

浪茄、大灣西、鹹田，均為國際級靚海灘，各有捧場客。呢一段一次過行晒三個靚海灘，見識西貢東部最優美海岸。

參考遊記及路線資訊

• [JoyeeWalker行山系列] 6分鐘行完《大浪西灣》
• [週末行山] 當年第一次行山 就係行麥理浩徑第二段

衛徑九段 (八仙嶺)

由汀角路山腳望番上去，八座山峰連綿，固然係鬼匠神功。上到山，由仙姑峰回望黃嶺，更令人嘆為觀止。

航拍 from Kai Hin

參考遊記及路線資訊

• [90後本土遊] 長征八仙嶺
• [JoyeeWalker行山系列] 4分鐘行完 賞・芒草山景《八仙嶺》

港島徑八段 (龍脊)

多次被海外媒體選為世界最優美山徑，確係名符其實。山徑既近市區，龍脊風景美不勝收，難怪每逢期假都旺過旺角。(怕熱鬧朋友記緊閒日先去)

參考遊記及路線資訊

• 龍脊風光美如畫 – 港島徑第八段
• 周末短遊港島群山 龍脊行

鳳凰徑二段 (大東山)

大東山爛頭營高山草原，當然令人驚嘆，而呢到亦因為地勢關係，天氣變幻莫測。春天大霧，秋天盛長芒草，近年成為香港人打卡勝地。(所以，又係嗰句，怕熱鬧朋友記緊閒日先去。)

參考遊記及路線資訊

• 金芒秋色大東山(上)、金芒秋色大東山(下)
• [週末短遊] 大東山行山賞芒草

麥徑八段 (大帽山)

香港最高峰，兼且係中國南海最高點 (所以解放軍霸幅地起雷達站)，上到去真係幾遠都望到。不過天氣難以捉摸，去到隨時食白果。

圖: KaiKuen

參考遊記及路線資訊

• [每個人心中有座山] 香港之巔大帽山
• [KaiKuen] 大帽山日出

衛徑四段 (沙田坳道)

亦即係麥徑五段。雖然係石屎車路，對行山友嚟講吸引力不大，不過呢度九龍半島夜景確係香港地標之一。難怪夜晚塞滿睇夜景嘅私家車。

圖: Eric@八十後的光怪陸離

參考遊記及路線資訊

• 獅子山下且共濟—麥理浩徑第五段
• 寒冬漫步北九龍

鳳凰徑三段 (鳳凰山)

講可到達嘅位置，呢到先至係香港最高點 (因為大帽山天文台一般市民唔畀入)。高山加埋天壇大佛，可以話係鳳凰徑嘅標記。

圖: Conrad Mo

參考遊記及路線資訊

• [Lantau 27] 鳳凰山的雲海
• (Ｎ年前的) 鳳凰山觀元旦日出
• 雲霧縹緲鳳凰山 (鳳凰徑第三段-上)、雲霧縹緲鳳凰山 (鳳凰徑第三段-下)

港島徑五段 (小馬山)

同係衛徑二段。呢到可以話係港島嘅後花園，小馬山雖然得四百幾米，不過可以一覽大潭水塘，以及維港東部海景，既容易又有靚景，係港島徑最佳寫照。

圖: Eric@八十後的光怪陸離

參考遊記及路線資訊

• 上山賞海賞大潭 – 港島徑第五段

麥徑四徑 (馬鞍山)

開揚景觀，特別係馬鞍坳以及昂平高原，一邊眺望西貢海，另一邊回望吐露港，絕對令人心曠神怡。

參考遊記及路線資訊

• [囉嗦大叔] 走完馬鞍山爆seed
• [週末不短遊] 馬鞍山行山: 吊手岩、牛押山、馬鞍頭峰、大金鐘

在山友嘅商議過程裏，好多時都爭議不休。有啲話麥徑三段耳牛石山同第一段萬宜水庫值得上榜，有啲又話沙田坳只係普普通通。大家覺得邊到最靚邊到唔夠靚，不妨留言討論!

Fitz 提提你：
任何行山遠足活動，必須在出發前作出詳細規劃以及準備，擕帶充足及合適裝備，以及告知親友目的地及回程時間。制訂路線，更要量力而為，注意補水，切忌逞強冒進。更多:《[顧己及人] 山野遠足安全常識》

Fitz 連結: https://fitz.hk/?p=99514