[獅子山精神隊] 轉個彎就到隊隊友 Sharon 一月一賽走上毅行 (毅行倒數18日)

Law少許耀斌 2018-10-29

兩年前2016初秋，當我仲未知毅行者為何物(其實連麥理浩徑都未知 😭)既時候，見一位朋友努力練。但唔係為左跑，而係為左練毅行者，又夜晚走去操山…我先知道原來跑步可以用黎練山，行山有樣野叫夜山，山賽中有樣叫毅行，行程有成100公里😱。

我佩服佢，奈何當時我n年無運動，最近跑既路賽只能有3k，望住100k呢個數字，心中輕嘆而羨慕。

Needed some change

那時開始每個月報一個路跑賽，用以確保自己每月有一點點的運動量。但只賽不練，以賽代練，因比賽只為迫自己吊住啲運動量，如果減到少少肥已經好滿足。而且沒有教練，沒有訓練program，不知從何入手🙈。

與山結緣

第一次玩山，源於陰錯陽差報左山賽 (當時既每月一賽，其中一個月無比賽就到日期，於是諗住山都照報啦)。咁大膽係因為無知，無知到一個點: 以為山賽係同百萬行差唔多，應該好輕鬆啦，最多急步走，唔通跑咩 (果時完全唔知個山係跑得🤦🏻‍♀)。點知一開槍，前面跑，後面推，山間路窄，無辦法太慢而唔阻人，唯有焗住 jog 住去……

最牙煙係，當時我一身裝束係平時落街跑步咁款，乜裝備都無。背心無，補給又無，連水都無帶枝 (當左自己路跑10K咁)，好彩仲識得上山著返對行山鞋。明顯睇得出同其他山友格格不入，上線後好想搵洞捐，澄清我唔係有心標奇立異架 🙈!

----- 廣告 Ad -----

就係咁，在無知中玩完第一個山賽。覺得好中伏 (其實係自己伏自己)，但深刻難忘。筋疲力盡，腳痛幾日，因原來山係另一種玩法。上坡落鈄樓梯大石碎石泥漿隨時轉 mode，要帶眼睇路，要帶腦思考。山野變化多端，係咁新鮮刺激，又叫人謙卑。

擺脫無知

沒有訓練，沒有策略的賽下去並不好玩。

那時參加左一個跑會跑手堂 (唔係想賣廣告，但真心感恩果度識到既每一位)，有一堆志同道合的跑友，無論練習山賽路賽，都有人(俾我) 追，有人 (起後面) 推，進步神速。

初馬ok，我ready了

有教練，有訓練，有 program，有跑友朋友精神上既支持，2018春既渣打馬拉松，有幸完成到。本身唔係耐力型既人(練習時跳船是常態，或者開頭爆發完後繼無力)，完成到第一隻全馬係好大件事 😱。覺得可能可以行到毅行。

遇上樽頸

初馬之後半年因一啲事，個人狀態差到練習最多只連續跑到3-5公里，tempo run 要斬件先完成到。平時既5K披醒竟然不及 fit 時既半馬披醒。我以為就這樣會開始走下坡，雖然覺得好灰，但真心以為體能方面就這樣了。畢竟最大進步空間係啲十八廿二既專利吧。

----- 廣告 Ad -----

萬事俱備，只欠緣份

雖然身在瓶頸內，毅行夢的種子卻繼續發芽。今年再和幾位跑友入籤，但慘烈地4支全軍覆沒😭。雖然失望，但沒緣份就不勉強。放棄了找隊伍後，便在報了一個毅行同一個 weekend 的10k，讓自己好歹有個目標。點知報左之後翌日，經朋友、Law少的穿針引線下，confirm 到有隊3缺1的 team 可攝我入去! 這樣，擦身而過的毅行又重投懷抱了☺。

也許雙坳很難

“就難在其實雞公到處有碎石怎麼辦”~。當人處於樽頸久了，難免開始懷疑自己。當同時人生其他方面也不順遂，兜兜轉轉的時候，久遺了的突破絕對能移走那條壓垮駱駝的最後一根稻草。

沒想到突破竟來自毅行者的雙坳操練 (麥理浩徑第3-8段)。由北潭凹起步直至荃錦坳，爬升3200多米，是毅行者們”考牌”的路線。過了城門水塘燒烤場後，開始跳意漸生，如果有人提出，我會即刻和議放棄跳船。感謝隊友們的堅持，一位早在第三段已拗柴，另一位條ITB痛左好耐..傷兵都未輕言跳船，我自然無聲出🙊。實在不行的時候，我們分幾次在山頭休息/小睡。寒風迫人，只要找到相對避風的位置/石頭，已拋開一切潔癖變身野人mode, 只要係唔太拮pat pat既平面，我都接受做我既龍椅😂。撐到接近早上5點，完成這54公里，感覺得返半條命，卻突破了自己的極限。

處於人身低谷大半年，這段突破的經歷猶如荒漠一道甘泉，激勵我再次前進。

說好的初衷呢？

一開頭毅行者只是個小小的白日夢，很遙遠，連”目標”都不能說得上。誰想到短短兩年間，由零運動/3K到全馬，再加啲緣份，遙遠夢突然變得這麼近。

整個運動跑步玩山的初衷，是想減肥; 想玩毅行，是因好奇，也爲羨慕，覺得毅行既距離係外星人既玩意，覺得成件事好型。結果肥就（我認為）減唔成，反而忘掉了初衷，開始追時間，追距離。再後來，時間距離之外，珍惜的係每次玩山跑步既經驗，係我呢個路痴開始認到少少路既喜悅，係由無知到好似 pro啲既過程，係擁有健康/無傷患困擾既感恩，係一路上遇上既友誼☺。

黎緊將會係小女子第一次挑戰毅行/100K。歡迎大家以各種形式支持我地 Team 973 ”轉個彎就到” 。或者當日見到打個氣💪🏼😊