[獅子山精神隊] 遲到正烏龜隊 身袋5L水的少男Ken (毅行倒數第16日)

少男 KEN 為人低調，作為 遲到正烏龜隊 及至整個獅子山團隊中最年輕一人，皆因入世未深，亦唔想成為眾人焦點，一直都拒絕寫文出樣，當然 group photo 就無所謂，兩個人係一個 group。

所謂少男情懷總是詩，佢諗緊乜你點會知，我 Law少作為隨團小編，唯有點出 KEN 仔幾個特質俾大家認識吓。 KEN 仔本為其他兩位成員的打機朋友，由虛擬世界轉戰麥徑，明顯係一個脫毒旅程 (雖然佢知行完山都好似有下場約人食飯)，精力與精神力都係眾人之冠。自從跟我地行山之後，就口口聲聲形容我 Law少已經人格破產，皆因我地專業山界騙子都會以XXX就到系列拂悠一下初哥，轉個彎就到、五分鐘就到、落完呢後就到。聽得多，身邊嘅鋒哥又經常誇大我地嘅欺騙程度，令到我落得人格破產，毫無誠信，可知我地帶人上山幾多美麗的謊言都係源於再應對人性嘅軟弱，副作用係嚴重影響 KEN 仔嘅價值觀。

亦唔知係咪成日俾人點，所以佢就缺乏安全感，搞到行個山都要拎5L水，次次都當揹水一戰咁行，然後就用每個零鐘一次小便去回應，每當我好似海關咁檢查一下個重量，我直覺覺得搞咩個袋咁鬼重，原來係足足5L水，而「我真係飲好多水」就係佢嘅口頭禪。

所以明顯地佢下一個特點就係尿頻，飲水飲到一個鐘去一次咁滯，唔知以為佢係濫藥後遺症，而佢仲以為自己走到草叢神不知鬼不覺，但其實夜嘛嘛，拎住個電筒行埋一邊，梗矚目過漆黑中嘅螢光蟲啦。

除咗飲，就係食，KEN 仔無糖不歡，HICHEW 又殺，假生果糖又殺，所以我地行三四都托「轉個彎就到」隊而享受咗一個糖生果籃，而佢最離譜係人地食飯之前叫人地食可樂味 POWER 糖，除咗食壞腦之外都唔知點樣形佢。

儘管喺我呢個老 seafood 眼中，佢都係香蕉未成熟時，但聽到佢地11月都仲想練1-5段嗰種瘋狂同熱血又實在後生可畏，希望呢種對麥理浩嘅愛比起對其他囡囡嘅愛會燃燒得長少少啦。

遲到正烏龜隊樂施會籌款網頁

>> 更多獅子山精神隊的故事，見《[獅子山精神隊] 一件tee 一個故事》

有一班行山友叫「獅子山」Facebook專頁

Fitz連結: https://fitz.hk/?p=106434