(只談比賽、不談風月)
到達35KM的一刻，我振臂，然後就如由細睇到大的龍珠一樣，我大叫一聲「呀」，然後旁邊的跑手都為之震驚，就算得唔到「佢嘅氣真係好強」嘅讚美都好，無呢一叫，我個心就會好似打邊爐無GAS一樣，閃多兩閃就會熄⋯
六大東馬是我人生第一次海外馬，我由起點後第一秒講起，今次我跑，有三個目標：
PB、SUB-4、完跑。(完走，是限時內完成全馬，與其說完走不如說完跑，在香港無論接近六小時還是上次渣馬 PB 4:17我都從未試過完全用跑去完成。)
----- 廣告 Ad -----
面對零概念的賽道，我唯一要做到的就是完美地執行計劃，
- 10KM：一小時內
- 20KM：55分內
- 30KM：55分內
如無意外，最後12.195KM 就有1小時10分鐘去完成，堅持到5:45 pacing 就能將三個目標同時達到。
整條路段微上落斜，置身大約四小時完成的跑手當中，能夠互相感應，大家一過某KM數就望錶，全程沒有人突然加速突然減慢，只有在補水補食物的時候，附近的人才會面目全非，因為這班人有貨但只剛剛足夠挑戰 sub-4。特別多謝兩位男士，一位是身型矮小戴腰包跑的伯伯，另一位是身材高大 GEL 行頭的猛男，20KM 內我與伯伯此起彼落，20KM 外就常見猛男，我一飲水就墮後，轉個頭又追上。沿路搵私人 pacer，經驗之談係有時得，有時唔得，其實撞得多嘅係可以一跟，上述兩位就係。
沿途風景確實一絕，大街大巷，give me five 我都玩咗4、50次、淺草雷門、Skytree、東京鐵塔全部都可以跑住 seflie。沿途最令人驚喜係一大粒無核鹽梅，但真係時間緊迫，唔係可以仔細去睇其他民間食物。補給站定時有嘅大量香蕉、柑、同應該係糖 (雖然馬王Eric完全見唔到) 再次說明貧者越貧、富者越富的道理。
唯一係渣馬周度小便就真係無呢支歌仔唱，都係乜都要排隊，去洗手間都玩咗三分鐘。
或者我天生幽默，所以我無辦法正正經經四小時，其實跑全馬係一件好特別嘅事，需要好多奇怪嘅經驗去累積。之前我累積過嘅包括有每隔三、五公里覺得枯燥的時候，我提醒自己「依」起棚牙露齒笑，用真笑容帶動情緒。
----- 廣告 Ad -----
今年我新加做默劇，當上斜嘅時候，我將雙手放前，好似有一條無形嘅大纜俾我扯住上去。
睇紀錄表(下)其實好值得高興，頭30KM完全跟足指示去做，當時已經不斷祈禱，求主加力俾我，到十公里喇，最後十公里，個心已經無乜力。儘管去到35KM依然保持，還有足足40分鐘去完成餘下7.195KM，係需要 5:36 pacing，係難，但我未認輸。往年在西隧上斜一般已舉手投降，但到呢一刻，我就悟空上身一樣，大叫一聲 (人地可能以為係慘叫)，左手邊的大媽選手都嚇一嚇。
我終於感受到完跑嘅難度，PB唔難，因為賽道比香港容易，sub-4未知，但原來要堅持下一步唔行要跑係真係好Q難，真係好Q難，真係好Q難，唔係抽筋、唔係痛、而係完全無哂力去維持一個6分以下 pacing 嘅心臟。
通常呢一刻惰性就會出現，有機會就想埋水站飲水唞，一唞就唔想再跑返。然後，又水站，又行又跑，呢個頻律越來越密直到8、9分 pacing 度，好頹咁完。
我接受唔到自己咁樣，我覺得咁樣完全對唔住六大、對唔住東馬、對唔住咁多支持大家完成嚟打氣加油嘅人。
悟空上身之後，我跟住一位叔叔，望住佢對腳，心中只有一個信念，我要死跟住佢，我由36KM跟到37KM，足足一公里，全程注視右邊呢一雙腳，對方應該感覺到有個騎呢友死跟住佢。
37KM一完，一抬頭，我真心覺得頭暈。當時仲未完全死心⋯⋯
到我有意識睇時間嗰陣，剛剛3KM尚餘十五分鐘，勉強保持跑勢，直到四小時，剛好41KM，此時pacing已跌到7:30。
----- 廣告 Ad -----
就喺呢一刻神奇的詩歌 playlist 剛剛返去第一首歌，即是由等起步加四小時，剛剛好就完哂playlist，預備俾我sub-4。
我爆咗，投降，最後五公里真係最難堅持跑嘅五公里。最後一公里，我唱住歌返去，氣係有，心已經無哂力，Gas 爐最終都要熄。
其實，凡事都不過如此，心跳都不過如此，面對前方，大力打自己心口幾搥，繼續跳繼續去啦。
全馬大大話話都完走十次八次，東馬 PB 4:08，係好又唔係好。我手上嘅選手帶暫時都唔會除，直到我再跑下一馬，點樣做到完跑，然後不減均速完成35KM至42KM，就是我下一個目標。
到時我恨恨剪帶，再破PB。
賣文籌款時間，小弟3月23日隻身到墨爾本參加樂施毅行者，希望能夠在海外好好完成100km路程。
現附上捐款網頁，是非常有心思的網頁，讓你知道你的捐助，實際能在世界幫到甚麼。
----- 廣告 Ad -----
更多：
Fitz Facebook專頁
[渣打馬拉松2018] 人生中最重的一場感冒
99% Sub 3的渣馬冠軍 鍾人貴
[我的2017] 做個領袖生
[獅子山精神隊] 致隊員Raymond: 你流鼻血，我流馬尿
山友食飯的九型人格
屋企出發徒步去沙灘?
Law少 許耀斌@Fitz
