[獅子山精神隊] 回應了上年期望的隊長Jacky (毅行倒數19日）

2018年10月19日 (撰文之日)，
距離第二年參加毅行者仲有唔夠一個月，
經歷過上年獅子山精神隊之後，
我兌現咗承諾，
將隊長Law少嘅寄語實現咗，
2018年樂施毅行者裡面以隊長身份帶一隊毅行隊伍出發。

話說今年二月尾三月初嘅時候，
上年都有參加毅行者，以29小時完成嘅傳道人，
佢知道我2017有完成毅行者，
就問起我上年完成嘅情況，
後來話我聽以我身體質素，30個鐘，
肯練，一定得。

我本來半信半疑，口頭話如果有一隊的話今年我會參加。

點知? 傳道人真係搵啲多三個弟兄出來參加。

後來四月，五月，就五個人一齊行港島嘅山。
六月開始操麥徑。

後來六月登記隊伍，四個得我抽中，仲要係後備隊伍，即係得我一個有機會抽中，要等其他中籤隊伍放棄我地補上。

等咗一個月，中埋，成為公開組隊伍，結果係:隊友全部抽唔中，我嘅後備隊名額補上。

就係咁，我就成為咗隊長。

我地隊個陣容好有趣，有一個現職消防員，有個求學時期已經開始打籃球，有一個平時有做運動，我就有跑開步同上年參加過一次毅行者。

本來今年練習嘅時候都想睇下今年會唔會行得輕鬆啲，行咗幾次，發覺唔對路，點解行完個感覺同上年差唔多嘅呢?

細心d諗，今年練嘅距離差唔多(其實今年好唔同，今年到後來越練越多，越練越長，近排居然練雙坳，真係人都癲)，但練習完成時間快過上年好多。所以雖然感覺差唔多，但同樣嘅距離用少咗時間完成，其實效率高咗。

今年其實呢個隊長身份唔係重點，反而點樣學習同隊友建立默契，將自己行過一次嘅經驗帶比隊友先係重要。

上年比人照顧，今年就要學識發揮身處團隊裡面嘅角色。

點解話今年咁唔同呢?
上年以47小時馬拉松式完成，
今年我呢隊嘅目標完成時間為28至30小時，
所以真係好認真去準備。

獅子山精神隊對我嘅影響，
除咗讓我完成咗一件唔容易完成嘅事，
讓我記在心中以後唔會輕易放棄之外。

亦提升咗我身體同心理質素，去面對未來嘅風浪，
除咗突破咗自己精神復元經歷嘅限制之外，
亦都話比我知，人生嘅難關係會不斷咁來，
惟有不斷鍛煉自己，準備好自己，
才會遇強越強，
才能夠成為強者。

撰文: Jacky

Law少呼籲: 今年大家可以直接支持今年毅行隊伍 編號1017 ，或者有興趣就睇下面賣番件Tee:

『築字室』設計師方立一為獅子山精神隊設計一款兩色的隊衣，除了經典『獅子山』及『向高山舉目』墨寶，配合毅行路線圖，加上男女裝前後皆可拼成整條路線，扣除成本後會將捐款全數捐給樂施會，希望打爆籌款數字，首批隊衣預期在毅行比賽前送上。

(注意：28/10 00:00 前的訂購才有可能安排毅行前送衫，敬請留意）

如果你都想繼續支持我地，等大自然親手悉心改變更多人，請你捐款或買隊衣支持我地。

以下係訂購表格，詳細可以了解吓，唔明可以搵 Law少。

** 訂購連結 **

>> 更多獅子山精神隊的故事，見《[獅子山精神隊] 一件tee 一個故事》

有一班行山友叫「獅子山」Facebook專頁

Fitz連結: https://fitz.hk/?p=106297