[找數真漢子] 我誤判我行山逆走100番外篇

Eric@fitz 2018-04-05

字縮小字型大小。字重設字型大小。字放大字型大小。

2012年6月24日，歐洲國家盃8強英格蘭對意大利，120分鐘激戰過後仍然互交白卷，要互射十二碼分勝負。如果你好似我咁，係英格蘭死忠球迷，當時都應該知道輸咗九成，最後佢哋亦「不負眾望」順利出局，22年來第7次喺大賽射輸12碼行人止步。

你話英格蘭班球員有無盡力? 有，一定有，但當悲劇一再重演，就唔係運氣咁簡單，係球員無料又好，係教練唔夠班又好，總之就係技不如人。

吹咗咁耐，其實我係想講：「我唔想變成英格蘭。」

上圖係我找數以嚟，總共 DQ 咗嘅比賽。街馬，我可以瀨無準備，純粹攞經驗；渣馬，我可以瀨係初馬，條路難唔啱跑；逆走100，我仲可以瀨無時間操山，去到大浪西算係咁，自我感覺良好。

----- 廣告 Ad -----

但係，我唔想咁做。

十二碼次次收工出局，就算係英格蘭，盡咗力，又如何?

愛因斯坦話：「瘋狂的定義就是，一直重複相同的事情，卻期待不同的結果。」(“Insanity is doing the same thing over and over again and expecting different results.”) 我唔係痴線，更唔係佛系跑手，緣份到了都應該完唔到賽，所以寫埋下面嘅報告，就係時候正視問題，搞掂之前都唔會考慮參加比賽。

逆走100

既然數已找，點解仲要攞苦嚟辛? Well，咁我未至於生活苦悶到要折磨自己搵衝擊，事實係，自從當年完成毅行者後，好想單獨完成一次100公里。我係鍾意行山多過跑步，不過「逆走100」時限32小時，都預咗要跑嘅。

----- 廣告 Ad -----

出發前唔知點解同咗KK、何亨同蔡東豪合照，呢次仲唔係我誤判，我XX……

起點—鉛礦坳

賽前不斷同自己講，頭50K一定要保留體力，學KK話齋：「去到獅子亭要好似無行過咁!」我明，我真係明，所以頭段上斜都用咗KK教落嘅上山大法，越斜就越要細步上，對於小腿成日都咁緊嘅我，最有用嘅秘訣係幾時都要全掌落地，因為咁樣小腿肌肉先唔會緊，唔容易抽筋 (事實上全程亦無抽過)。

開頭仲有心情影相

細細步上白波

結果，我用咗大約7小時去到CP3鉛礦坳 (29.9km)，比原定一小時4公里嘅目標快咗少少，重點係 (以為自己) 唔係好覺攰。嗰一刻我真係妄想已經盡得KK真傳，得道成仙，點知惡夢其實準備開始。

草山—獅子亭

逆走麥徑，草山係第一條要上嘅天梯 (之前大部份上山都係石屎斜路)，話晒喺度有兩次拍攝毅行教室嘅經驗，以為可以輕鬆過關，點知一上就知出事。正如前述，上斜路用細步可以慳力，但上樓梯，無論你點行，都好難避免較大幅度嘅提腿，加上草山啲樓級鬼死咁高，烈陽又鬼死咁猛，所以未行到一半已經爆爆地，就喺接近斷氣嘅時候，忽然傳來一聲：「喂，你咪找數真漢子!?」

當時我真係好想搵窿捐，可惜草山連樹都唔多棵，唯有死頂：「咁都俾你認到，師兄點先?」

逆走草山，就是不斷上大級樓級

後來 Facebook 相認，原來呢位「師兄F」當時唔知我有份參賽，以為只係普通行下山，我當然唔怪佢，因為我真係上得好慢好慢，而佢三兩下手腳已經唔見咗人。

多謝攝影師照顧慢腳人士

----- 廣告 Ad -----

逆走針山都有好多樓級，但已比順走好多了

好不容易撐完草山同針山，喺城門食完令人感動嘅牛肉飯後，再向金山同畢架山出發。老老實實，起步前我最怕嘅就係畢架山，唔知點解硬係覺得上極都唔完，而最後去到獅子亭，我雙腳亦真係無晒力。

說好了的「好似無行過咁」呢?

多謝Will爺同Ca姐喺城門俾飽飯我食，又同我上畢架山，等我喺毅行十倍奉還吧

*喺度必須講明，因為本人無論體能、肌力以至上落樓梯技巧均嚴重不足，先至導致如斯田地，與本屆逆走100四人隊際男子組冠軍 “Cosmoboys” 及「毅行教室」教授之技巧並無任何關係。(我都知呢句好廢，但係真嘅)

畢架山上嘅九龍夜景，真係無得輸

獅子亭 Support 團隊: 多謝康師傅嘅速遞服務、Kaluen嘅撞車接送、阿pi嘅無敵暖牛肉飯，仲有考完試即嚟陪行嘅Hugo

獅子亭—水浪窩

今次比賽其中一個熱門話題，就係麥徑「順走」定「逆走」難啲? 我覺得如果用頭50K計，逆走係較易，例如上大帽山白波行車路，已經慳到好多時間。問題係，順走最難嘅麥三、麥四，倒轉嚟行又係點? 呢個我可以肯肯定答你：「再難啲!」

超感謝「麥四字典」Hugo陪我行咗一個通宵，你嘅每一步帶路，都幫我慳咗好多精神同精力，無你我應該要搞多幾個鐘先落到山

正常行山攻完頂，落山係開心事，但以馬鞍山嚟講，只係有無盡嘅碎石大石，再加上佢哋非常大級，已經腳軟同無比眼瞓嘅我，每一步都係折磨，最後落到麥四車路嗰刻，真係差啲喊出嚟，不過實在太攰，最後瞓住咁落水浪窩。我夜晚10點由獅子亭起步，去到CP7 (企嶺下) 已經朝早5點，足足用咗7個鐘，絕對 DQ 關鍵。而我亦喺呢個時候，同 support 嘅債主講咗成世中其中一句最重要嘅說話：

「我誤判了，100K係難過全馬的，請原諒我。」

水浪窩—北潭坳

其實就算捱到水浪窩，都只係完成咗65公里，距離終點仲有1/3。頂唔順瞓咗半個鐘，又要向雞公山出發，當時已經半死嘅我，無胃口都要啃埋個老麥起程，目標係行得幾多得幾多。

----- 廣告 Ad -----

逆上雞公山一啲都唔好受，但落山更難

天光後上到雞公頂，瀕死嘅我，已經諗緊 DQ 出返西貢食車仔麵定係豆腐火腩飯好。忽然，後面又傳來一句：「喂，你咪找數真漢子!?」(又嚟!?) 原來，我喺唔知幾時過咗師兄F，幾十K後又重遇；又原來，師兄F係玩4人mix隊際，而家只係剩返兩個隊員 (佢同另一位同我狀態差唔多嘅女隊友)，結果我哋三人又龜速落咗一段雞公，當時魔鬼一直同我講：「算啦，行到北潭坳都唔算失禮架喇」，仲決定埋一陣去食車仔麵添。點知，後面忽然又有幾個藍衣人殺到，又大聲傳嚟：「咦，你咪係Eric!?」

大會掃尾大隊，會跟住最後一位參加者行到下一個CP，非常貼心嘅安排

古語有云：「人怕出名豬怕肥。」雖然我只係一個19作者，但喺呢個 moment 又點可以認衰仔。負責掃尾嘅跑友 Henry Yeung 問我係咪要 quit，我梗係話係堅持緊，一日未 cut-off 一日都未放棄! 同一時間，女隊友忽然同師兄F講：「我真的不行了，你還有力氣，你先走吧!」唔使兩秒，師兄F幾個箭步又唔見咗人，臨走時仲好型咁拋低一句：「放心，我唔會俾我哋全軍覆沒的!」見到咁熱血嘅劇情，加上面子尤關，我竟然決定死跟! 不過留意，當時仲未到雷打石，諗到盡都係去到嶂上先算。(**師兄F最後以31小時多完成，名乎其實真．男人!)

好記得好記得，去到嶂上嗰陣係9點10分，而路牌係寫住「北潭坳 1小時」(CP8 10點 cut-off)。呢個時間，東馬衝閘一幕忽然閃現眼前 — 你唔係講過「只要有丁點機會都要去試」架咩!? 最後，我決定極速轆落山 (雖然仍然好慢)，最後早 cut-off 6分半鐘過到 CP (見下圖)。

仲有25公里，應該會係跑狗咁跑嘅25公里。

壓線成功，唔知笑定喊好

北潭坳—西灣村

呢一段，我只係記得做過三件事：落斜就跑、上山就搏命死撐、停低就飲水食gel；呀仲有一樣，每15分鐘問自己一次：「究竟我喺度做緊乜?」

臨時演員都係演員，點都要交下戲扮辛苦

其實真係好攰，平時唔用pole都用埋

12點正跑到落西灣水站，雙腳已經無晒力，大會義工亦選擇喺呢個時候出聲：「肥仔，你趕唔切去CP9架喇，咁嘅款個半鐘頭點上埋西灣山呀? 你都係走吧啦。」(唔係原句嚟，其實佢係和藹可親咁，同所有參加者講的，不過無瞓一晚嘅我get到嘅意思係咁…)

行咗80+km，當然想搏埋落去，不過再聽到義工話，大會有DQ主任打電話取消資格，嗰一刻，唯有無奈選擇放棄。只差十幾公里，失望一定有，但我最唔開心都係辜負咗一班 support 嘅心機。

CP8 跑勻全世界Run The World 的義工哥哥，其實真係好nice，向我解釋DQ安排，最後佢哋仲被選為最佳CP

負責掃尾嘅跑友 Henry Yeung 都到了，佢話驚訝我仲頂到咁遠 (好合理嘅質疑)

最後嘅 support team，由北潭坳一直夾到我去西灣，包括無瞓一晚做 support 嘅債主，同埋之前一日腸胃炎嘅WL，咁嘅組合唔怪得知會DQ (講下笑啫)

西灣村—西貢市

你以為DQ咗，故事就此完結? 少年你太年輕了。既然決定唔行落去，咁梗係用最舒適嘅方法閃人。行上西灣亭唔係路，搭大飛先至係皇道，我哋決定用每張飛$150嘅價錢，坐船出返西貢碼頭。好貴? 我話呢$150好抵就真，去相去片!

成隻船大概坐到十幾人

簡單用「海盗船」去形容呢一程，絕對係侮辱咗佢。45分鐘船程入面，成架船被無數次拋起再衝浪，船長就處之泰然繼續高速前進 (其實係唔快唔得)，就算眼瞓到爆炸，我都成個人醒晒，捉到實一實。雖然每一個浪都好似同死神擦過，但又可以欣賞到西貢六角柱、火山岩等等壯麗景色，所以話用$150買個畢生難忘嘅經歷，係咪好抵先? 不過以後就算點攰都好，我都會行上西灣亭搭車，完。