前言
武俠小說裏面，武功嘅最高境界，就係「無招勝有招」。層次更高嘅，就係連勝負都唔計較，達到中國哲學嘅「絕聖棄智」，只係追求內心嘅滿足。金SIR話：「跑步並唔係生命中唯一選擇。」
呢句說話出自一位跑步教練之口，絕對有獨孤求敗嘅氣慨。佢睇到嘅，絕非只是跑道上嘅里數，而係人生中漫長嘅路途。
而金SIR有如此想法，就要由佢最初跑步嘅日子講起。
由凡人跑手到33分半
講緊係廿幾年前，當時金SIR仲未係金SIR，係叫金永強，一個平凡嘅整餅師傅仔。
「嗰陣我其實一路都無乜點運動，直到1995年，我因為計劃兩年後要結婚，就要操Fit下自己。咁我上司就叫我同佢一齊去跑下步啦。」
「當時我真係對跑步一無所知，連邊度有訓練班都唔知。後來加入咗跑會之後，得到唔少前輩嘅指導，到2000年，我10公里嘅成績已經到去40分鐘左右，我真係覺得自己幾有天份架！後來越練越快，2002年最佳成績去到33分半！」
「點解會進步得咁快？嗰陣跑步好期待可以話畀人知自己有能力，所以好有鬥心。而且，因為得到跑會前輩嘅指導，佢哋教我『跑步要靠基本功』嘅道理，所以我好努力咁做好跑姿，令成績得以提升。」
遇上了挫折
「2003年，我面對工作同跑步嘅抉擇。」
「當時喺工作上，我承受唔到咁大壓力，患上焦慮症，更需要接受治療。嗰陣我完全唔可以handle自己嘅工作，亦停止咗去跑步。」
「最初仲以為可以透過跑步去穩定自己情緒，但發覺唔可以。情況仲越嚟越差，嚴重到控制唔到身體，更有自殺嘅念頭。」
有人以為，情緒問題其實只係自己「諗唔通」，只要有人開解下，做下運動就會無事，但事實上情緒病絕對需要治療，唔可以忽視。當時，情緒問題完全打垮了金SIR，佢停止咗正常生活，亦停止了跑步。
「好彩當時經人提點，亦得到教會嘅幫助，個人醒返！但仍然唔可以工作，有少少壓力都適應唔到。」
「藉住信仰嘅幫助，我開始喺教會同其他教友一齊玩音樂，彈下結他，唱下歌咁，亦開始返跑步，以及做返整餅嘅工作。」
幫助別人更幫助了自己
「2007年，我認識咗Kitty。Kitty佢一路都同一班視障朋友做運動。而經一位牧師提點，覺得我都可以用我嘅專長去幫助有需要嘅人。就係咁，我得到Kitty嘅介紹，認識更多視障人士，亦幫助更多有需要嘅朋友。而我嘅情緒亦慢慢變好。因為我發現，原來自己有能力可以令其他人快樂。亦發現自己嘅情緒雖然唔穩定，但比起有啲人身體有毛病，其實我都叫做幸運。」
「於是我一路咁做義工，一路得到更多滿足感。亦因為咁，我跑步都跑多咗。」
是同學會不是訓練班
金SIR叫得做金SIR，係因為佢係「重金屬同學會」嘅創辦人同埋教練。睇組織名稱，一般人完全唔會諗到係一個長跑訓練班。事實上，金SIR成立「同學會」嘅原因，確實係好單純！
「最初我組織訓練班，都係想約埋一啲志同道合嘅朋友一齊做運動。由最初得6個人，到而家有固定會員。」
「我本身有份工，唔需要商業營運，所以我哋可以好專注咁留心每個學員，大家嘅感情好深。」
>
「我哋叫做『重金屬同學會』，『重金屬』係因為我玩音樂。『同學會』嘅意思，係希望大家好似一家人咁。我好想身邊最近嘅人明白咩係生命中最重要。」
生命中之重
「跑步嘅人好多時都有唔開心，間中會有失落感。好似話時間唔好，有受傷咁，就容易有情緒問題。但如果明白生命嘅意義，你就唔會咁介懷呢啲小問題。」
「我唔強調跑步嘅成績，因為跑步唔係生命中唯一選擇。我希望藉住大家一齊做運動，可以提升大家嘅生命質素，亦即係人人可以開開心心。」
「我哋同學會成立咗7年，原來呢個諗法真係有人buy！我發現喺訓練班入面，大家可以好投入，但同時又可以好relax，好放鬆咁享受運動嘅樂趣。呢個層次比起追求時間係咪高啲先？有時學員可以放鬆心情比賽，反而可以做出好成績。」
「學員返到嚟訓練班，大家會親切問候，相信大家都會感受到呢一份關心。」
「生活要有智慧，考驗其實喺賽事以外。所以最重要嘅係，點樣用跑步去融入生活。所以，我哋喺跑步訓練之外，仲有好多機會畀學員去體驗生活。譬如話我哋會搞啲義工分享會，亦鼓勵大家去做義工，希望大家可以從中提升生命質素。」
後語
同金SIR做訪問，我原本希望可以偷下師，學下咩係跨步，點樣可以跑快半分pacing。最後，我明白咗一件更加重要嘅事。
我諗起我細路時代，點樣通山跑，又諗起我點樣同阿囡喺公園玩捉依因。嗰時我從來唔會計較自己跑得快唔快，剩係記得我有幾開心。
跑步最單純嘅意義，就係開心。乜唔係咩？
更多：
Fitz.hk Facebook專頁
[年少多好] 跑步環台1000公里 HeHe畢業之旅
[專訪馬高教練] 同你講心的魔鬼
一個「廢青」跑出全世界的故事
Fitz Running 跑步
為何要運動？去公園看看那些四五歲的小朋友，從跑跑跳跳所得來的喜悅吧！勿忘初衷，運動會令人快樂，難道我們都忘記嗎？
