[獅子山精神隊] 番外篇 消失於富士山下的「毅行者」(倒數第4日)

「毅行者是一幅用腳走成的地圖
由日出之地畫到日落之處
穿梭於動物與人的家
放下了平常生活的包袱
抓緊了此刻的基本需要
伴著四人的呼吸聲、軀殻內的心跳
在時間、空間、距離找到了屬於自己的一點
或許就是山之巔⋯叫富士」

將以上一段文字獻給已經消失於富士山的毅行者之魂，唔使驚，無死人，魂之謂精神，隨住日本樂施會今年1/10宣布結束運作，完成了由2003年起的任務，日本毅行者亦將消失。

其實繞富士山的毅行路線早在2014年後消失 (當時聽參加第一屆韓國毅行者的跑手講，近幾年已經改為走近福島的路線)。日本毅行路線之所以經典，對我來說畢生難忘，雖然我當時只玩半程 (印象中是47KM/53KM)，最尾天光之際抵達山中湖的 YMCA 終點，遠眺整個富士山，然後在義工多過參加者的場面下衝線，依然歷歷在目 (我地凍，佢地仲凍)。

未試過得幾度通頂行山，臨天光反而最凍然後可以在日式的澡堂中梳洗，面前一潭黑池水，幻想到沖幾多隻泥鴨先可以變成咁，但能夠光脫脫坐在櫈仔上沖花哂 (浸溫泉前指定程序)，呢種解凍解疲勞嘅感受，只有細個去浮羅交怡沖露天浴室，邊沖邊望天的享受可比擬。

眼前一閃，已經四年，住大帽山隊友無再玩山，曾經每星期練麥三、四嘅隊友，佢嘅杯中物 litre 數應該多過km數，女隊友最近嫁咗個好人家就更加唔會同三條佬上富士山啦。

事過境遷，山未移但路已盡，今日再回憶去記錄係因為呢個係我第一次參加海外毅行，無探路第一次就要行，見路就去，係反光帶駁反光帶咁行。

路上有頭文字D式秋名山上奪命飄移 (真係差啲撞到隊友)，隊友望見「熊出沒注意」然後又行到好似迷路嘅恐熊感，所有嘢都非常不確定，由出發前嗰程車個腦度已經不斷彈出「都唔知係唔係」，而四個隊友其實都非常有性格，本身又唔係四個都好熟，但又一齊玩得非常開心。

毅行在本地係非常家庭式，管食管睡管行管衣管埋按摩，係行一次，記一世，而海外毅行分分鐘係人一世，行一次。永遠多謝2014年玩玩吓行50KM嘅隊友，無呢50KM，就無韓國毅行，墨爾本毅行，還有將來嘅英國毅行。

係呀，定咗一個小小目標，去歐洲行返次，期待三位隊友再來一次「無take 2」之旅。

支持獅子山精神隊 1017打爆$36000
出年延續 行一次 記一世嘅精神
捐款連結 (編號1017)

>> 更多獅子山精神隊的故事，見《[獅子山精神隊] 一件tee 一個故事》

有一班行山友叫「獅子山」Facebook專頁

Fitz連結: https://fitz.hk/?p=107419