做運動對婚姻生活的10大好處_002英國傳媒引述美國耶魯大學嘅研究話,丈夫如果有運動習慣的話,會增進夫婦之間感情,令婚姻生活更美滿。

簡單講,丈夫持續運動,身體因受安多酚嘅影響,心情會好,會令妻子都同樣開心。不過,研究話妻子做運動,係對婚姻生活無幫助咁話。(資料:英國每日郵報)

做運動對婚姻生活的10大好處
我唔敢話自己係碧咸,不過每日郵報揀咗呢張相做呢單新聞嘅主題圖片。講婚姻生活,又點解剩係著條底褲?

當然,如果講婚姻美滿,我應該點都唔及我哋Blogger李國泉兄,佢嘅文章成日出現佢一家三口Sweet Sweet嘅合照。

不過,我結婚六年,都可以用過來人身份講下做運動對婚姻生活的好處,一定係唔剩係得安多酚囉。

  1. 你因為要做運動,雙方多咗獨處時間,減少磨擦
  2. 老婆少咗啲理由去鬧你立亂買嘢(「我一個禮拜跑成50K,對鞋好快爛呀!」)
  3. 食豆腐火腩飯都唔會畀人鬧(「陣間跑番10K乜都無晒啦!」— 前題係,你個Runkeeper唔好Share畀老婆睇。)
  4. 星期日可以豁免唔使陪佢返外家(「你知啦,星期日好多比賽丫嘛。」)
  5. 跑步行山令你認識更多郊野地方,一家大細放假都可以多啲地方去玩
  6. 夫婦間嘅話題唔再局限喺工作、兒女、家事,話題多咗,感情自然增加
  7. 兒女會因為你做運動而有樣學樣,小朋友乖啲,夫婦間又少咗一樣嘢有爭執啦(我囡囡就話因為佢老豆有跑步行山,話會專心啲上體育堂喎)
  8. 你因為要做運動,就算做少咗家頭細務,老婆都可以容忍
  9. 你因為做運動要沖涼,老婆又少咗因為你唔沖涼上床訓而鬧你
  10. 你參加比賽,老婆帶埋仔女嚟打氣,咁就多咗一樣家庭活動嘞

結咗婚嘅朋友,仲唔快啲換對跑鞋落街番轉?

私人留言:康仔,恭喜你六月新婚之喜!呢個婚姻小貼士就當係賀禮啦!

更多:
第26項重拾跑步樂趣-生理篇
25個重拾跑步樂趣的方法

Fitz Sports 運動

分享
家聯
為何要運動?去公園看看那些四五歲的小朋友,從跑跑跳跳所得來的喜悅吧!勿忘初衷,運動會令人快樂,難道我們都忘記嗎?