[中國馬拉松精英排名賽] 號稱全球門檻最高馬拉松 430落閘 常州舉行

中國每年都有數以千計嘅長跑賽事，各個比賽為咗爭奪參加者都各出奇謀，大派紀念品之外，亦要諗綽頭，有啲用名勝古跡為主題，有啲搵大明星落場，而呢項比賽就以參賽門檻最高做招徠，目標係要填滿12,000個名額。

賽事叫「中國馬拉松精英排名賽暨我要上奧運萬人賽」，今年4月將於浙江常州舉行。根據主辦大會所講，佢哋為咗提升中國馬拉松水平，特意定下限時門檻4小時30分鐘，逾時不候，係目前為中國整體水平和參賽門檻最高嘅馬拉松。

依照香港渣馬數據，選手平均時間為5小時左右，430呢個門檻確實令唔少人卻步。不過，常州嘅主辦單位好有信心，佢哋聲稱會邀請10,000個喺其系列賽嘅達標選手參加，其餘2,000個名額開放畀公眾。

雖然話報名時參加者要提交證明達到430水平，不過中國馬拉松常有出術、造假情況，恐防到時有大批人被落閘DQ，回收車都應該幾熱鬧。

中國馬拉松精英排名賽

• 比賽日期: 2020年4月19日（星期日）
• 比賽項目: 馬拉松（42.195公里）
• 地點: 浙江常州
• 賽事規模: 12000人
• 比賽路線: 起終點（中華恐龍園-迪諾水鎮——東經120）
• 報名費: 180元人民幣

資料: 新浪網