Sammy So: 乜嘢態度 | 與Kolor蘇浩才深度遊運動、音樂、愛情

就算個樣寸寸地，又有紋身，只要夠靚仔，你唔會驚佢

你放心，一定會問埋同蘇太(盧巧音)點相處。
繼續放心，一定會問點睇現時的香港樂壇。
仲導賞Sammy全身紋身。
咁Sammy跑步呢? 約旦超馬呢? 頑張呢? 阿歹(謝覺偉) 呢?
OKOK，追加番。

(文章好長，中間已盡加八掛膚淺水站，難得 Sammy 埋呢哋水站都俾到有深度回應，希望你可以撐到最後果兩句。)

Sammy 提議在深井上清快塘走一轉，只跑5K爬升212m，背後是對樂悠咭持有者的一份關顧、體諒和忍腳。我落山時段加快步伐，免得 Sammy 汗都無滴返屋企，會被蘇太懷疑盤查。分手時 Sammy 好交戲向我說:「阿孫你都幾fit喎。」害得我信以為真，開心左兩個鐘。

「回顧過去四十幾年嘅人生，有乜嘢重要嘅分水嶺?」有質素問題，交返個波俾被訪者做埋分析，唔洗做資料搜集等收成。

「一定係音樂同運動。我係工業學院讀電腦，跟住做一份正常工作，係政府任電腦操作員。」世俗覺得你讀電腦去做電腦是正常，打政府工更加正常er。

「沒多久就辭職，做份唔多正常嘅工作，轉投音樂的懷抱。」
「屋企有冇壓力?」
「又冇乜，我係獨仔，阿爸阿媽都較為開放，佢哋只係有點擔心我。」2005年成立Kolor至今，對音樂此情不渝。亦成就了 Sammy 的事業，世伯伯母不用擔心。

「至於運動，以前有玩籃球、踩板、BMX。後來經常在錄音室，天昏地暗，無做運動，又煙又酒，作息混亂，有胃酸倒流，又痔瘡，身體響起好多警號。」是步入中佬的必經程序?

「因為見到愈來愈多身邊的人跑步，於是試下。另一邊廂，樂隊中的鼓手玩開健身，studio 放了很多餅、bar、啞鈴等，佢仲考埋教練，於是幾個兄弟一齊玩，大家好熱血，有鬥心。」玩 band 的 (男人）都唔多鍾意著上衫，有需要砌番幾格朱古力出嚟。

「玩左運動後有乜嘢變化?」
「明顯條氣好左，以前開 show 兩個鐘已經想死，而家連唱3日仲可以去跑步 (似賣靈芝補藥廣告)。運動亦影響我嘅音樂，玩 band 成日黑沉沉，人又憤世嫉俗，都幾陰暗。運動帶來好多正能量同多正面思維。」

其實 很多哭與淚不要因由
其實 幾多苦戰都不會退後
全速直闖 再沒然後
任何狀況 都接受
千把刀吞進咽喉
(無需要理由)

運動帶來 Kolor 陽光。

與黑狗戰鬥的抑鬱歲月

「2011年我患上抑鬱症，以前較少提及呢段經歷。那時覺得好灰好驚，間中有焦慮突襲。加上我經常飲酒，又瞓得少，情況愈加惡化。幸好有朋友是精神科醫生，開始食藥，維持了兩年。中間也有反覆，當醫生調較藥的劑量時，焦慮的徵狀又走番出嚟，要再次戰鬥，那條路並不平坦。自己總算能夠堅持服藥，現時已不用再食藥，那時太太和另一隊員都受抑鬱困擾，大家互相交流支援。」

「病情嚴重時，你有冇試過有輕生的念頭?」
「我冇，不過太太有。」背後是頭纏繞不息的黑狗。

飽受抑鬱困擾的前英國首相邱吉爾曾說:「抑鬱就像頭黑狗，一生咬住不放。情緒找不到出口，只能默默承受黑狗的欺淩。」邱吉爾害怕站在陽台和火車站月台，當急速的列車進站，他要退避一隅，那種一躍而下的衝動，在腦海湧現翻騰。戰勝黑狗，要有強大的毅力。

「你係唔係一個有毅力，能夠堅持到底嘅人?」
「都算係，雖然唔係頭十名，應該係二十名內。如果對住阿歹，我會係佢一半。」論毅力，阿歹係第一集團的人。

「不過回望與抑鬱的戰鬥，音樂、跑步和太太好幫到我走番出嚟。」
「以前雖然唔係花天酒地，但我係好鍾意熱鬧鍾意玩，我太太剛剛相反。我成日唔夠精神，好辛苦。我而家要盡量保持自己清醒，不再過日夜顛倒的生活，要keep住每個星期有兩三日常規運動，其他的日子要去跑步。」

「你將運動跑步放係一個好重要嘅位置?」
「因為這十年運動帶俾我好多嘢，身體、生活、音樂、人際等等各方面都有好大的影響。因為跑步我搞左「頑張」跑會，有機會接觸到一班後生仔，可以同佢地嘅世界接軌。」

頑張 – 平行線上與阿歹相遇

講開跑會，是阿歹出場的時間。
「你點識阿歹?」
「我同佢係 Spartan Trail 比賽中認識，阿歹有聽開我哋嘅歌，係網上有留下言。佢見我係山賽出現，會 message 問我跑成點。」典型小粉行為。

「佢係『逆之男』(疫情前) 攞冠軍，用個名叫『歹歹歹』，我同搞手Peter (即而家經常同試跑員一、二號出嚟暖人地個場嘅 Why not run 主持人)都摸不清，呢個突然闖進地球的外星人究竟係邊位? 後來才知之前經常留言的就係佢。」

「阿歹都鍾意飲酒吹水，大家都想多啲人出嚟跑步，不用計較速度成績，總之肯跑就好。有了這個概念，不如固定一個日子，逢星期一係深水埗運動場5點半，不收費，你想得到一些跑步知識又好，覺得一個人跑好悶又好，總之乜嘢人都可以嚟跑。」

跑班同學有快有慢有肥有瘦有紋身冇紋身，但有一個共同點: 想跑

「第一堂有十多個人嚟，而家每堂約有40位同學。」發展迅速，相信不是因免費。
「跑班有乜嘢發展目標?」
「冇架，同學自由 in and out，有時會帶一些朋友嚟，跟住佢自己冇嚟，唔需要好特別的 attachment，我同阿歹對佢哋又冇乜責任需要負起，教與學都好自由式。」

「頑張係日文加油 (干爸爹) 的意思，背後有冇一份精神同態度?」
「頑張個名係來自多年前我嘅同名歌，唔想叫中文「加油」咁普通。其實背後有一份熱血，叫人撐住、頂住嘅奮鬥精神。」

「頑張吸引到乜嘢人嚟跑?」
「九成幾嘅同學以前都冇跑開，而家有一班跑得唔錯嘅同學，係頑張 elite，全馬朝住sub 3目標。」

「頑張會唔會走其他跑會一樣嘅路，以爭取成績為主?」
「我哋都諗過呢個問題，所以阿歹搞左個「無名」跑班，俾想做時間成績嘅同學參加。阿歹而家遇到另一問題，係愈來愈多人加入。」

「唔知點解我見到阿歹就好似見到一個老朋友，佢原本好沉默內向，係俾我打開左。」Sammy 擴闊了阿歹的人際網絡，帶他進入另一個世界，任歹奔馳，擦亮了他的親和、率性、勇毅和幽默，成為越野跑界的耀眼新星。在我訪問阿歹的文章中 -《阿歹生命中的兩個女人和一個男人》，Sammy 在 FB 留言說: 我就係呢個男人。

「其實我細個果時都係好靜，冇乜朋友。」
「點會呀? 你又social又話爛玩，點會冇朋友?」
「我阿媽係菲律賓人….」咁即係點?
「我同佢係用英文溝通，爸爸是香港人，但在屋企也是用英文溝通…」仲未估到其中的關係。
「我細個唔識中文，親戚說唔可以唔識中文，要送我去中文學校，我同同學溝通唔到，所以冇乜朋友。」明白，Sammy 也懷著菲律賓人喜愛音樂的 DNA。

戰火中的約旦沙漠半馬

惡名昭彰的撒哈拉沙漠馬拉松 (Marathon des Sables，MDS) 是越野跑手嘅懼怕又垂涎欲試的極地超馬，不過非一般地球人玩得起，所以有lite版。在約旦 Wadi Rum 的H MDS 是半馬 Half Marathon Des Sables，門檻低，溫柔可親太多。

賽事是 stage race，分4日舉行，Day 1-30km，Day 2-60km，Day 3-休息日，Day 4-30km。大會提供交通，配給食水，醫療應急同帳篷，參加者需全程自行攜帶所有糧食和裝備。

「這是個一年的約定，有個friend話這個比賽一生人必定要玩一次，也是我哋三人 (另外是阿坤和阿楊) 可以應付到的。講到好有意義咁。於是我哋3個人計劃了一年，準備在11月成行。」

「不幸到了10月，以色列與哈馬斯開戰，約旦與以色列接壤，雖然賽事地點 Wadi Rum 不近加沙地帶，日子逼近，我哋要決定是否成行，但當地實際的情況不太清楚，唯有定出一條線，就是旅遊警示，香港政府沒有發出針對約旦的旅遊警示，聯絡主辦當局，佢哋話OK呀，好歡迎遊客到訪，而且比賽期間會有軍人守護，於是決定成行。」

「各項細節大會安排得好好，賽事第一天零晨3、4點坐了5個鐘頭車去到沙漠起點，用了大約12小時跑了25K，大部份路段都係曝曬，每10K有水站，約7成是浮碎石，個袋 keep 住有7-8Kg，跑是好困難，係頭10K叫做跑到下，其餘都係行。晚上10多度，好舒服。睡帳幕，有洗手間，環境唔錯。」

「第一日我同阿坤OK，阿楊起左兩個水泡，第二日要行62K，頭30K水泡開始惡化，幸好大會規定了必帶裝備有safety pin，消炎藥膏，可以即刻試下放水，再穿兩隻襪，繼續行。去到check point，工作人員說不能幫我哋料理，因不衛生，要返去大本營的clinic做，阿楊帶住水泡行了15-16個鐘，我哋成日都同佢講轉個彎就到鼓勵佢，幸好阿楊的心理質素很好，知道好難得才有機會來到，一定要撐落去。」

「第三日是rest day，可以好好休息和沖個涼。」
「有水沖涼?」
「因為水是每日每人定額分配，自己決定點用。第三日我哋每人剩番樽半水，一些用來洗衫，一些用來洗頭沖涼。」好豪呀!

「第四日半夜出發，氣溫只有5、6度，十分之凍，唔跑會變雪條。有一位後生外國跑手 (其實全個賽事只有 Sammy 一隊是來自亞洲)丟失了寄艙行李，所有 gear 和 gel 都泡湯，包括跑鞋。佢決定穿著唯一的波鞋出賽，結果圍著雙腳都佈滿水泡，好像馬啼鐵。我哋同佢包尾，大家約好返到終點飲啤酒。」

「成個賽事有冇人退出?」
「冇，第三日時大會說有機會所有隊伍百分百完賽，那位年青人決定唔退出。最後大會頒了頭三名的獎項外，特別頒了個勇氣精神獎給他。」滾動。

「去到最後一日，大家都好唔捨得，冇諗過真的可以置身其中，沙漠喎，完成到喎，成件事都好夢幻。」

「呢個賽事對你有什麼意義?」
「呢個比賽對我哋三個都別具意義，其實對於我來說這不是一項比賽，是一次歷練和修行，搵到我哋想要嘅信心同平靜。」
「我覺得係時候去睇下呢個世界，玩音樂時我去過好多地方，但未試過用腳去體會。我有些朋友用幾十日去行以色列步道，有些玩2百多公里的極地超馬。我都想藉著呢啲trip去尋找我的人生意義，可能係我的bucket list。我係天主教徒，做 research 時發現耶穌在約旦河受洗，原來可以距離自己這麼近，覺得好神奇，好像冥冥中註定。」感性的 Sammy，其實法例冇規定中佬唔可以講人生意義。

呢條片睇果陣會起雞皮，翻起熱血:

「運動方面未來有乜嘢目標?」
「我注重路跑為主，山賽都是玩票性質。想用兩年時間完成六大馬。」
「你現時全馬的時間是?」
「3小時23分，也想走進3小時內。」路雖漫長，一步一腳印，總有一日登上彼岸。

(執筆時知道 Sammy 已確實倫馬可以成行，努力呀蘇浩才!)

「我見到你係 IG 有條片影你戴住黑色格仔頭巾在慢跑，是否一種表態?」
「我哋係香港見到新聞報導事件，可能判斷了誰對誰錯，不過這都未經證實。我去到當地，感覺到人民都不是好戰，聽到有人叫 Free Palestine。我去到攤檔見到有三種顏色的格仔巾。檔主解釋紅色是代表約旦人，綠色代表警察同軍人，黑色代表巴勒斯坦。於是我買左條黑色。」

「作家村上春樹曾說過高牆與雞蛋之間，他會永遠站在雞蛋這邊……無論高牆多麼正確，而雞蛋又多麼錯誤。Sammy 你認同嗎? 會企邊度?」
「都係雞蛋。」Sammy 冇再補充。
(頭盔位: 坊間對高牆與雞蛋論有不同的理解和論述，不宜憑一兩句說話就去標籤和定位。)

風雨中的香港樂壇

「你覺得香港樂壇的創作空間有否收窄?」
「或多或少都有，其實自己都會小心審查一下，試過拎一些歌去派台，佢哋講到明呢啲歌我哋唔會播。又試過拍好晒個節目，出街時都剪左。所以我哋會寫「遠一些」，邊緣一些，好似寫詩咁，明嘅就明。」

「呢三年 Kolor 發展都算順利，其實今日嘅成績，係以前無數嘅晚上累積而來。以前除了返工瞓覺，都係 studio 開著部機做音樂，漫無目的砌左一堆野，不知不覺累積了好多材料供今日去創作。」

「回頭看，我地無揀錯行音樂這條路，只不過行得耐左。」

呢啲歌衫容不下肚腩，明白band 友點解都要玩健身 (Wikipedia)

「Beyond講過香港冇樂壇，只有娛樂圈，你覺得而家香港樂壇係唔係咁?」
「其實而家冇分樂壇同娛樂圈，新一代的創作人係爆緊出嚟。一方面現在有電腦、internet、youtube，有好多個體戶在做音樂，自己搞mixing，唔一定要租好昂貴嘅studio。另一方面也不再需要依賴電台電視台去發佈，亦唔需要緊隨唱片公司電視台的遊戲規則，佢哋有自己的平台去發表，有自己的followers，從制度中解放出嚟，反而是電台電視台要去跟網上的走勢。」

「就好似摩西解放了希伯來人，帶領佢哋出紅海。」嘩，有咁波瀾壯闊?

「以前做歌要改少少嘢，要 book studio，做 mixing 嘅 setting 要推要扭好多掣，要影相記住。而家可以係電腦 call 出嚟就搞掂。而家做一個訪問可以散出去，全部媒體都見到。以前拎歌去電台派台，要親自上去同 DJ present，而家 send 個 email 過去便成，簡約太多，大家可以在山洞做音樂。不過唔代表冇人出嚟聽演唱會。」

「而家好多新 band，不過要俾時間和耐性，要有一份堅持。好似我哋都熬左十 幾年至見到成績。例如與我哋同期嘅 Dear Jane 大家仲玩緊，大家都係各有各嘅位置，又或者我哋前輩太極 Joey 哥仲好活躍。好希望而家玩 band 嘅真係可以堅持落去，少一隊就少一隊，冇左就係冇左，好可惜。」

「老實講，要出到嚟嘅樂隊一係好勁一係要靚仔靚女，要講形象計包裝，世界好現實。不過因此亦令樂隊令音樂去得更遠。」畢竟形象包裝不是一宗罪。

動的浩才遇上靜的巧音

「你講過同太太是兩個type嘅人，點解當初會有火花?」
「我同太太是因音樂而認識，佢係靜態、感性的；我係動感態、粗心大意嘅。但大家好合得嚟，我都解釋唔到，好奇妙。」兩性關係中，似乎都係性格互補長久過性格相似。

“生日快樂老婆 I wish you the best till the best will become the best that will return and become the best again, i love you happy birthday#強嚟 @candynurilum ” – 呢個大男孩確係幾可愛

「我哋結左婚10年，我會帶佢出去識下我嘅朋友，擴闊生活圈子。而佢睇好多書，會講一些 quotes 俾我聽，而且擅長分析事情，俾到好多角度我，覺得大家愈來愈接近。呢個相遇係好神奇，我好珍惜。」

「兩性關係中我不嬲都好失敗，我係燥底，但果斷，如果覺得唔啱話撤就撤，分左手冇friend做。」

「燥底嘅人，我理解會係幾自我同自負，唔理會對方感受，點解對你太太可以放得低自己?」

「都係運動帶俾我嘅發現，當我玩左運動之後，發現自己嘅渺少，冇得自負，要認輸。另一方面，當我有陣子唔做運動時，好快會打回原形，我真係唔想去返以前嘅自己，所以要keep住。」

「當同太太有衝突時，會trigger到你燥底嘅火藥庫，你果刻點控制?」
「我發老脾燥底時，老婆唔會還火，所以嘈唔起。果刻佢冇反擊，好像一塊鏡，俾我見到自己語氣重同暴躁，我係傷害緊對方。其實事情的對與錯不再重要，重要嘅係我 hurt 左對方。」兩性關係中理性不是排第一位。

世界有比對與錯更重要的事情，蘇浩才，你好有愛!

彩蛋

「Sammy 你啲紋身一定有故仔，講嚟聽下。」又係睇肉時間。

「右腳小腿個太陽係第一個紋身，因為我係獅子座，又玩rock，太陽可以代表熱同火。媽媽唔多like，不過當時的我當然冇理會。」

「左手臀是梵文，代表不動明王，也反映我有火的性格，因為是關節位，有些人說紋在這些地方會好痛，我就係要試下有幾痛，睇下自己頂唔頂得順先。」成個百厭仔反叛樣出晒嚟。

「上面是天堂，下面是地獄，我形容為代表矛盾嘅內心。右手臀是一位墨西哥女紋身師紋的， 根據瑪雅曆法我所屬的動物而紋，原來我屬於蝙蝠，著重聽覺多於視覺，我覺 得好啱，因為我係玩音樂。而且蝙蝠是活在黑暗之中，群體得嚟又可以好獨 立，好吻合我的性格。」

「右大脾的面具是 Mr. 樂隊主音吉他手 MJ(譚傑明)學左紋身之後，初出茅廬之作。」看見背後是一份友誼和信任。

「背脊側面紋的是一段經文，是做彌撒神父領聖體時所讀的一段 provisions of faith，講神怎樣去彰顯佢嘅榮耀，我哋要點樣表達對神的信心。每當神父讀經文時，整個教堂都好莊嚴肅穆，我好有深刻印象。」

訪問期間，總覺得 Sammy 散發一種態度，但一時間到三時間都說不出是什麼，直至見到傳媒人伍家謙 的 FB post (係呀，我仲係fb (唔出post) 的用家)，講他好珍惜同仔女相處，就算要犧牲一些事情。

最後他說要盡力去「做自己鍾意做嘅嘢」同「鍾意自己做嘅嘢」，冇錯，就係呢種 Dear Myself 態度囉!