[深圳半馬集體造假] 不能承受的蠢

由

2018-11-30

Fitz > 運動 Sports > 跑步 Running > [深圳半馬集體造假] 不能承受的蠢

昨天 (11月28日) 有報導，指一場在鄰近地區舉行的半馬賽事，出現大規模 (共258人) 違規情況，包括偽造號碼布、代跑、更有46名跑手在折返點前穿過綠化帶，走捷徑到回程的路上，估計省掉4.2K。

與跑友吹水談起此單造馬案，他說目擊過一次在澳門舉行的馬拉松，在接近衝線前的數K，有跑手把掛在身上的號碼布，交給另一人去衝線，他們不是前列跑手，代鎗的目的不是去呃獎杯，只是讓跑「尾籌」的人有張衝線照片，和拿到完成牌!

「X!」明嘅，呢個廣東話單字，聽到呢度我都有講。

倫敦金、網上虛擬情人、順豐包裹…，這些騙案，你可能概嘆當事人被呃愚蠢，但有什麼事情蠢得過自己呃自己!

自己報名跑馬，交幾舊水報名費，冇人用鎗指住你個太陽穴，唔去跑又唔洗死，唔會俾女飛，一樣有工返。就係唔明點解要走捷徑 (又唔係會得獎)? 交左報名費，跑少4.2K，唔係應該蝕左水咩? 條問題深過太空點解有黑洞、iphone XS Max 點解賣$12499!

幸好大會很快作出聲明和回應，表示絕不接受這些違規行為，並對有關選手判處停賽等不同處分，並公佈他們的名單。

其實任何事都有初心，跑馬初心可能是做時間，要sub-3，要 cut off time 之前唔好被 cut，要攞完成牌、要威俾條女睇、要 IG 放閃、要攞住支國旗衝線、要係終點求婚…，OK，各取所需，冇人會 gut 你，但唔好呃自己，更重要的是唔好沾污一位「神」，佢個名叫「體育精神」!

落得場，呢位「神」大晒，佢最重視公平競賽，除了同對手，還要同自己公平競賽。輸俾對手，甚至 DNF 都未輸得晒，下次再嚟過，有跑未為輸。但輸俾自己，自我行騙，就會破產，冇得翻身! 因為你已遺失了自己，不能尋回!

拿著一張跑少了 4.2K 或找人代跑的完賽證書，名字是你的名字，但成績不是你的成績，你放上 FB 呃到好like，呢一刻好爽，但你真的會開心嗎?

即係咁，你個仔肥肥白白好鬼 cutie，好多人讚，但其實佢唔係你個仔，是另一位巴打經手的，你還會感到光榮同驕傲嗎?

這不能承受的蠢，我頂唔順!